Հայաստանի եւ Լիտվայի ԱԳ նախարարները հանգամանալից զրույց ունեցան երկկողմ հարաբերությունների հարցերի շուրջ
Դիվանագիտական առաքելություններ
Ապրիլի 5-ին կայացավ արտգործնախարար Էդվարդ Նալբանդյանի հանդիպումը պաշտոնական այցով Երեւանում գտնվող Լիտվայի ԱԳ նախարար Աուդրոնիուս Աժուբալիսի հետ:
Ողջունելով հյուրին՝ նախարար Նալբանդյանը նշեց, որ հայ-լիտվական հարաբերություններն առանձնահատուկ բնույթ ունեն, ինչը պայմանավորված է մի շարք հանգամանքներով. Լիտվան առաջին պետությունն էր, որ ճանաչեց Հայաստանի անկախությունը եւ դիվանագիտական հարաբերություններ հաստատեց 1991 թ., Հայաստանի առաջին միջպետական պայմանագիրը ստորագրվել է Լիտվայի հետ, Լիտվան առաջինն է բալթյան երկրներից, որ դեսպանություն է հիմնել Երեւանում եւ առայժմ միակն է բալթյան երկրներից, որտեղ Հայաստանը բացել է դեսպանություն:
Շնորհակալություն հայտնելով Երեւան այցելելու հրավերի համար՝ Աուդրոնիուս Աժուբալիսը գոհունակություն հայտնեց երկու երկրների միջեւ վերջին տարիներին ակտիվացած համագործակցության կապակցությամբ՝ ընդգծելով առկա ինտենսիվ քաղաքական երկխոսության, արտգործնախարարությունների միջեւ պարբերական խորհրդատվությունների, ամուր իրավապայմանագրային դաշտի, առեւտրատնտեսական համագործակցության եւ մշակութային փոխանակումների ծավալների աճի կարեւորությունը:
Հայաստանի եւ Լիտվայի ԱԳ նախարարները հանգամանալից զրույց ունեցան երկկողմ հարաբերությունների հարցերի, մի շարք տարածաշրջանային ու միջազգային խնդիրների շուրջ:
Հայաստանի եւ Լիտվայի արտաքին քաղաքական գերատեսչությունների ղեկավարները քննարկեցին Եվրոպայում տեղի ունեցող գործընթացները, Հայաստան – Եվրոպական միություն համագործակցությունը, միջազգային կազմակերպությունների շրջանակներում փոխգործակցությանն առնչվող հարցեր: Այս ենթատեքստում քննարկվեցին Վիլնյուսում կայանալիք Արեւելյան գործընկերության գագաթաժողովի նախապատրաստական աշխատանքները:
Նախարարներ Նալբանդյանն ու Աժուբալիսը մտքեր փոխանակեցին արցախյան հիմնախնդրի խաղաղ կարգավորման գործընթացի վերջին զարգացումների շուրջ: Այդ առումով նախարար Աժուբալիսը վերահաստատեց Լիտվայի աջակցությանը Մինսկի խմբի եռանախագահության ներքո ընթացող բանակցային գործընթացի շրջանակներում հիմնախնդրի խաղաղ հանգուցալուծմանը:
Հանդիպմանն ավարտին տեղի ունեցավ Էդվարդ Նալբանդյանի եւ Աուդրոնիուս Աժուբալիսի մամլո ասուլիսը:
ՈՒՂԻՂ ԵԹԵՐ
Ամենադիտված 
Դիրքում բռնшբшրnւթյшն դեպքը տեսած, ապա սպшնված 3 զինվորների ծնողներն արդարադատություն են պահանջում (տեսանյութ)
