ՍԴ անդամը Սահմանադրության նախագծում տեսնում է դատական իշխանության անկախության երաշխիքները

Սահմանադրության նախագծի նախնական տարբերակը հեղափոխական լուծումներ է նախատեսում դատական իշխանության անկախության համար: «Արմենպրես»-ի փոխանցմամբ' լրագրողների հետ հանդիպման ժամանակ Սահմանադրական դատարանի անդամ Ֆելիքս Թոխյանը կարևորեց այդ փոփոխությունները' հույս հայտնելով, որ դրանք կնպաստեն երկրում դատական անկախ ինստիտուտի կայացմանը: «Առաջին կարևոր փոփոխությունը Բարձրագույն դատական խորհրդի ստեղծումն է, որը լինելու է դատական իշխանության անկախության երաշխավորը: Այն կազմված է լինելու 10 հոգուց' 5 իրավաբան-գիտնական և 5 դատավոր' ընդհանուր ժողովով ընտրված: Բայց ես կարծում եմ, որ դատական մարմիններում պետք է դատավորները կազմեն մեծամասնություն»,-ասաց Թոխյանը:

Դատական խորհրդի կազմը գործելու է մշտակապես և դրանում ներգրավված դատավորները կասեցնելու են դատավորի իրենց գործառույթները աշխատավայրում: «Դատարանների նախագահները չեն կարող լինել այդ կազմի մեջ: Խորհուրդը ղեկավարելու է նրանց մեջից ընտրված մի նախագահ' պարբերաբար ռոտացիոն կարգով: Սա ամենակարևոր փոփոխությունն է, որ կատարվել է: Երկրում բացի Սահմանադրական դատարանի անդամներից բոլոր դատավորները նշանակվելու և ազատվելու են Բարձրագույն դատական խորհրդի եզրակացության հիման վրա»,-ավելացրեց Ֆելիքս Թոխյանը:

Անդրադառնալով Սահմանադրական դատարանի մասով առաջարկվող փոփոխություններին' բանախոսը նշեց, որ դրանց մի մասը միանշանակ հիմնավոր է, մյուս մասը' մտահոգություններ է առաջացնում: «Ճիշտ եմ համարում այն, որ ընդլայնվել է քաղաքացիների' դեպի ՍԴ դիմումի ինստիտուտի ծավալը: Եթե մինչև հիմա քաղաքացիներն ու ֆիզիկական անձինք կարող էին դիմել օրենքի սահմանադրականության հարցով, ապա այսօր նախատեսվում է, որ քաղաքացիները կարող են դիմել սահմանադրական ցանկացած մարմնի ընդունած նորմատիվ իրավական ակտի մասով, որի սահմանադրականությունը պետք է դատարանը դիտարկÕ «: Բայց այստեղ մտահոգիչն այն է, որ այդպիսի ընդլայնումը կարող է մեծ խնդիրների առաջացնել Սահմանադրական դատարանի ծանրաբեռնվածության տեսանկյունից»,-նշեց Թոխյանը' անհրաժեշտ համարելով ՍԴ անդամների թիվը 9-ից դարձնել 12: «Սահմանադրական դատարանի դատավորների մանդատը սահմանափակված է 12 տարով: Ես կարծում եմ նվազագույնը 15 տարի պետք է լինի' առանց վերընտրության հնարավորության»,-նկատեց նա:

Ֆելիքս Թոխյանի կարծիքով' նախագծում ամենաժողովրդական դրույթներից մեկն այն է, որ Սահմանադրական դատարանի ղեկավարությունը' նախագահն ու տեղակալը, իր մանդատը չի ստանալու քաղաքական մարմնից, այլ ՍԴ անդամների կողմից: «Դատարանի նախագահն ու տեղակալն ընտրվելու են դատավորների կողմից' 6 տարի ժամկետով' առանց վերընտրության իրավունքի»,-նշեց նա' հավելելով, որ դա իր համար աննախադեպ դրական անակնկալ է: