Տպավորված եմ Հայաստանի կրթական ոլորտի բարեփոխումներով. Ուկրաինայի դեսպան

ՀՀ կրթության և գիտության նախարար Արմեն Աշոտյանն այսօր ընդունել է Հայաստանում Ուկրաինայի արտակարգ և լիազոր դեսպան Իվան Կուխտային, ով ավարտում է իր դիվանագիտական առաքելությունը մեր երկրում: Նախարարը շնորհակալություն է հայտնել դեսպանին' իր պաշտոնավարման հինգ տարիների ընթացքում կրթության և գիտության ոլորտում հայ-ուկրաինական կապերի ամրապնդմանն ու զարգացմանն աջակցելու համար:

Նախարարը գոհունակությամբ է ընդգծել, որ երկկողմանի կապերի ձեռքբերումներից մեկը Երևանի թիվ 42 ավագ դպրոցում Տ. Շևչենկոյի 200-ամյակին նվիրված դահլիճ-թանգարանի հանդիսավոր բացումն էր: Արմեն Աշոտյանը դեսպանին տեղեկացրել է, որ վերոնշյալ դպրոցը ՀՀ կրթության և գիտության նախարարության որոշմամբ ընդգրկվել է այն ուսումնական հաստատությունների ցանկում, որոնք այս տարի Համաշխարհային բանկի աջակցությամբ հիմնովին կվերանորոգվեն: Նախարարը շնորհակալություն է հայտնել Երևանում կայացած Բոլոնիայի նախարարական գագաթաժողովին Ուկրաինայի կրթության և գիտության նախարարի գլխավորած պատվիրակությանը' գագաթաժողովի աշխատանքներին ակտիվ մասնակցության համար:

Դեսպանն իր հերթին երախտագիտություն է հայտնել համագործակցված ու արդյունավետ աշխատանքի համար ՝շեշտելով, որ իր համար մեծ բավականություն է եղել աշխատել Հայաստանում: Իվան Կուխտայի խոսքով' Շևչենկոյի 200-ամյակին նվիրված դահլիճ-թանգարանի բացումն իրավամբ համարվում է հայ-ուկրաինական ջերմ հարաբերությունների ապացույցը:

Կողմերը քննարկել են նաև երկու երկրների միջև կապերի ամրապնդման հեռանկարները և նոր հնարավորությունները միջազգային կրթական հարթակներում, մասնավորապես, Արևելյան Գործընկերության, ինչպես նաև Էրազմուս և Հորիզոն 2020 ծրագրերի շրջանակում: Կողմերը վստահություն են հայտնել, որ կրթության համակարգում հայ-ուկրաինական համագործակցությունը ունի զարգացման մեծ ներուժ, քանի որ երկու երկրների կրթական համակարգը գնում է միևնույն' եվրոպական կրթական ստանդարտների համապատասխանեցման ճանապարհով, ուստի երկրներից մեկի կրթական բարեփոխումների արդյունավետ փորձը կարող է օգտակար լինել մյուսի համար:

Հանդիպման ընթացքում անդրադարձ է եղել նաև փոխադարձ համագործակցությանը վերաբերող այլ հարցերի: