Երիտասարդ մոդելավորողների հավաքածուներում հայկական զարդամոտիվը համադրվեց ժամանակակից նորաձևության հետ

'«Հայկական զարդամոտիվը ժամանակակից նորաձևության մեջ» խորագրով ցուցահանդեսի ընթացքում հայ երիտասարդ մոդելավորողները ներկայացրեցին իրենց հավաքածուները: Ինչպես փոխանցում է «Արմենպրես»-ը, Հովհաննես Շարամբեյանի անվան ժողովրդական ստեղծագործության կենտրոնում, «Հայկական շրջանակ» երիտասարդական նախաձեռնության կազմակերպած ցուցադրությանը զուգահեռ կենտրոնում բացվեց նաև հայկ ական տարազը ներկայացնող լուսանկարչական աշխատանքների մրցույթ-ցուցահանդես:

«Այսօր դիցաբանությանն ու ազգագրությանն անդրադառնալը չի վնասի մեր երիտասարդներին: Հակառակը, այն կօգնի ճանաչել մայրենին, կրոնը, հայրենիքն ու ճարտարապետությունը»,- ցուցադրության բացմանն ասաց ՀՀ մշակույթի նախկին նախարար Հովիկ Հովեյանը:

Հայկական ավանդական զարդանախշերի, գույների մոտիվների և ժամանակակից նյութերի, նորաձևության միտումների համադրմամբ՝ երիտասարդ մոդելավորողների աշխատանքներից շատերը բացի ցուցադրությունից կիրառելի էին նաև որպես երեկոյան զգեստ:

«Այստեղ ներկայացված իմ «Զվարթնոց» հավաքածուն ստեղծել եմ անցած տարի Արվեստների ակադեմիայի դիպլոմային աշխատանքիս համար: Հավաքածուում կիրառել եմ Զվարթնոց տաճարի հիմքերը՝ տարրերը: Գույները ընտրված են այդ տարրերին համապատասխան: Միայն կարմիրը, կրակի գույնը, ես ավելացրեցի զարդերի տեսքով», - ասաց երիտասարդ մոդելավորող Ժենյա Ասատրյանը:

Ցուցադրությանն իրենց աշխատանքները նաև ներկայացրեցին Լիլիթ Ղազարյանը՝ «Ուրարտու և հայկական դիցաբանությունը» և Լիաննա Սայրադյանը՝ «Հայկական գույներ» հավաքածուներով:

Նախագծի աջակիցներն են Հովհաննես Շարամբեյանի անվան ժողովրդական ստեղծագործության կենտրոնը, Տերյան մշակութային կենտրոնը, «Սփյուռքից Հայրենիք» կազմակերպությունը և «Պրինտ Սիթի» տպագրության սրահը: