Սեպտեմբերի 4-ը ՀՀ ՏԿԱԻՆ աշխատողի օրն է

ՀՀ տարածքային կառավարման և արտակարգ իրավիճակների նախարարությունը որդեգրել է անընդհատ զարգացման քաղաքականություն' չբավարարվել ձեռքբերածով ու մշտապես շարունակել քայլել առաջ: Նախարարությունը պարբերաբար հանդես է գալիս ամփոփ հաշվետվությամբ' հանրությանը ներկայացնելով կատարված աշխատանքներն ու նվաճումները: Ինչպես անցած տարիներին, այնպես էլ այս տարի ՏԿԱԻ նախարարության համակարգի գրեթե բոլոր ստորաբաժանումներում (կառուցվածքային ու առանձնացված, ՊՈԱԿ-ներ ու գործակալություններ) գրանցվել են առաջընթաց ու հետաքրքիր նորություններ, որոնք և ներկայացնում ենք ձեր ուշադրությանը:

Նոր կազմավորումներ փրկարար ծառայությունում

ՀՀ Կոտայքի մարզում ստեղծվել է Հայ-ռուսական հումանիտար համատեղ արձագանքման կենտրոն, որի նպատակն է Կովկասի տարածաշրջանում արտակարգ իրավիճակների դեպքում աջակցություն ցուցաբերել արձագանքման աշխատանքներին: Կենտրոնի խնդիրներն են' արտակարգ իրավիճակների կանխարգելում և հետևանքների վերացում, մարդասիրական օգնության առաքում, ականազերծում և այլն:

2014թ. ՓԾ հատուկ նշանակության փրկարարական աշխատանքների իրականացման կենտրոնում ստեղծվել է մոտոցիկլետային 2 փրկարարական խումբ:

2015 թ. ՔՊ վարչության կազմում ստեղծվել է Քաղաքացիական պաշտպանության ուժերի հավաքական կենտրոն:

Բոլոր մարզերում ստեղծվել են ճգնաժամային կառավարման կենտրոններ

Կարողությունների ապակենտրոնացման ծրագրի շրջանակում ՀՀ բոլոր մարզերում ստեղծվել են մարզային ճգնաժամային կառավարման կենտրոններ, վերանորոգվել ու բարեկարգվել են վարչական և հրշեջ-փրկարարական ջոկատների մասնաշենքերը, համայնքներում ստեղծվել և գործում են հասարակական փրկարարական կազմավորումներ, թարմացվել է նյութատեխնիկական բազան:

Ճգնաժամային կառավարման ազգային կենտրոնում ներդրվել է զանգերի կառավարման համակարգ, որը հնարավորություն է տալիս միաժամանակ ընդունել մի քանի հեռախոսազանգ և համակարգչի քարտեզի վրա նշել զանգահարողի գտնվելու վայրն ու հեռախոսահամարը, առանց կապն ընդհատելու միանալ համապատասխան ծառայություններին կամ զանգահարողին անմիջապես միացնել այլ ծառայության հետ: Միաժամանակ հնարավոր է ուղարկել ձայնային հաղորդագրություն, որի միջոցով կարելի է իրականացնել ազդարարում:

ՀՀ Տավուշի մարզում իրականացվում է ավտոմատացված ազդարարման համակարգի ներդրման պիլոտային ծրագիր, որի շրջանակում ռուս գործընկերների հետ համագործակցությամբ ազդարարման սարքավորումներ են տեղադրվել ՓԾ ճգնաժամային կառավարման ազգային կենտրոնում, Ա. Սպենդիարյանի անվան օպերայի և բալետի ակադեմիական թատրոնում, Երևանի պետական համալսարանում, Երևանի թիվ 8 ՀՓՋ-ում, Կոտայքի և Տավուշի ՄՓՎ ճգնաժամային կառավարման կենտրոններում, ՀՀ Տավուշի մարզպետարանում և 21 սահմանամերձ համայնքներում: