Ջանլուկա Մարչիանոն դարձել է Ալ. Սպենդիարյանի անվան օպերայի և բալետի թատրոնի հրավիրված դիրիժոր

Իտալացի ճանաչված դիրիժոր Ջանլուկա Մարչիանոն այսուհետև Ալ. Սպենդիարյանի անվան օպերայի և բալետի ազգային ակադեմիական թատրոնի հրավիրված դիրիժորն է: «Արմենպրես»-ի փոխանցմամբ' այս մասին հայտարարվեց սեպտեմբերի 4-ին օպերային երգչուհի Լյուբով Կազարնովսկայայի և օպերային թատրոնի գեղարվեստական ղեկավար Գեղամ Գրիգորյանի համատեղ կազմակերպած բարեգործական համերգի ժամանակ: Իրադարձությունն իրենց մասնակցությամբ պատվեցին ՀՀ Նախագահ Սերժ Սարգսյանը և առաջին տիկին Ռիտա Սարգսյանը:

Ջանլուկա Մարչիանոյին' որպես հրավիրված դիրիժոր, ներկայացրեց Գեղամ Գրիգորյանը: Իտալացի դիրիժորն իր խոսքում նշեց, որ աներևակայելի երջանիկ է լինել Հայաստանում և օպերային թատրոնում, որտեղ աշխատելու է Գեղամ Գրիգորյանի հետ: Նա նաև հավելեց, որ երջանիկ է Արցախ այցելելու համար:

Բարեգործական համերգին մասնակցեց նաև Հայաստանի պետական երիտասարդական նվագախումբը (գեղարվեստական ղեկավար և գլխավոր դիրիժոր՝ Սերգեյ Սմբատյան): Համերգի վերջում ՀՊԵՆ-ը հանդես եկավ Ջանլուկա Մարչիանոյի ղեկավարությամբ:

Իրադարձության հասույթը կտրամադրվի Հայաստանում ստեղծվելիք Օպերային արվեստի միջազգային ակադեմիային։

Ջանլուկա Մարչիանոն Հայաստանում է ՀՀ առաջին տիկին Ռիտա Սարգսյանի հրավերով: Նա Արցախում մասնակցել է Ջուզեպե Վերդիի «Ռեքվիեմի» արցախյան պրեմիերային: