ԵՄ-ն Հայաստանի և Բելառուսի հետ համաձայնագրերի նոր տարբերակ է մշակում. Լյուքսեմբուրգ

Եվրամիությունը համաձայնագրերի նոր տարբերակ է մշակում Հայաստանի և Բելառուսի հետ, որոնք ավելի քիչ կկապեն այդ երկրներն ու Եվրամիությունը, քան ասոցացման համաձայնագրերը: Այդ մասին, ինչպես տեղեկացնում է «Արմենպրես»-ը, հայտնել է ԵՄ-ն նախագահող Լյուքսեմբուրգի արտաքին գործերի նախարար Ժան Ասելբոռնը:

«Մենք փնտրում ենք մի համակարգ, որի դեպքում չեն փլվի բոլոր կամուրջները: Մենք հասկանում ենք, որ ասոցացման համաձայնագիրն անհնարին է, բոլորն էլ պատրաստ են գտնել ավելի թեթև տարբերակ: Այդ երկու երկրների հարցում բոլորն են համաձայն: Դա ասոցացման համաձայնագիր չէ, դա չի աշխատի: Դրա մակարդակը ցածր կլինի, չեմ կարող ասել թե ինչպես է դա կոչվում»,- ասել է Ասելբոռնը լրագրողներին ԵՄ-ի անդամ երկրների ԱԳ նախարարների ոչ պաշտոնական հանդիպումից հետո, որտեղ քննարկվել են հարաբերություններն Արևելյան Եվրոպայի և ՌԴ-ի հետ:

Նա նշել է, որ «այդ համաձայնագրում մաքսային արտոնություններ չեն լինի»: «Դրանում շատ բան կլինի, բայց մենք այժմ դա միայն քննարկում ենք»,- հայտարարել է նախարարը նոր համաձայնագիր մասին ավելի մանրամասն պատմելու խնդրանքին ի պատասխան:

«Մենք առաջարկ ենք արել Հայաստանին, Հայաստանը դրական պատասխան է տվել: Բելառուսում շարժում է դիտվում ոչ բացասական ուղղությամբ: Եվրոպան չպետք է բաց թողնի այն հնարավորությունը, որը հայտնվում է այդ երկրի հետ հարաբերություններում»,- ասել է նախարարը:

Արևելյան գործընկերության ծրագրում ընդգրկված են Հայաստանը, Ադրբեջանը, Վրաստանը, Ուկրաինան, Մոլդովան և Բելառուսը: 2014 թվականի հունիսին Վրաստանը, Ուկրաինան և Մոլդովան համաձայնագիր են ստորագրել ԵՄ-ի հետ ասոցացման և ազատ առևտրի գոտու վերաբերյալ, հաղորդել է ՌԻԱ Նովոստի գործակալությունը: