Ադրբեջանի կենտրոնական բանկի պահուստը մեկ ամսում 1,2 մլրդ դոլարով կրճատվել է

Ադրբեջան 6 Սեպտեմբեր, 2015 0:13

Ադրբեջանի կենտրոնական բանկի ոսկու եւ արտարժույթի պահուստներն օգոստոսին գրեթե 1,2 մլրդ դոլարով կրճատվել են:

Այս մասին, ինչպես հաղորդում է «Արմենպրես»-ը, հայտնում է Marja-ն' հղում կատարելով Ադրբեջանի ԿԲ-ին:

Ըստ հաղորդագրության' օգոստոսի 31-ի դրությամբ' Ադրբեջանի ԿԲ-ի արտարժույթի պահուստները կազմել են 7,315 մլրդ դոլար, ինչը հուլիսի 31-ի դրությամբ եղածի հետ համեմատ 1,186 մլրդ դոլարով կամ 14 տոկոսով պակաս է:

Ադրբեջանի ԿԲ-ի արտարժույթի պահուստները սկսել են նվազել անցյալ տարվա հուլիսից, երբ համաշխարհային շուկաներում նավթի գինն սկսել էր ընկնել: Պահուստների նվազումը կանգնեցնելու համար Ադրբեջանի ԿԲ-ն ազգային արժույթի' մանաթի 34 տոկոս արժեզրկում իրականացրեց ընթացիկ տարվա փետրվարի վերջին:

2014 թվականի հուլիսի 30-ին ԿԲ-ի արտարժույթի պահուստները հասել էին 15,193 մլրդ դոլարի: Բանկի ներկայիս պահուստներն արդեն 51,7 տոկոսով պակաս են: 2015 թվականի սկզբից Ադրբեջանի ԿԲ-ն արդեն 5 մլրդ դոլարից ավելի ֆինանսական միջոցներ է կորցրել:

Ադրբեջանի նավթի արտահանման ծավալներից եկամուտների տարեկան տատանումները գնի' մեկ բարելի դիմաց 10 դոլարով փոփոխվելու դեպքում կկազմեն մոտ 300 մլն դոլար: Ներկայիս դրությամբ' ադրբեջանական ամենաթանկ' Azeri LT CIF տեսակի նավթի գինն' այդ երկրի բյուջեում նախատեսված մեկ բարելի դիմաց 90 դոլարի փոխարեն կազմում է մոտ 50 դոլար:

Նավթի համաշխարահյաին գների եւ մանաթի փոխարժեքի անկման պատճառով Ադրբեջանի տնտեսությունը հայտնվել է ճգնաժամի մեջ. փակվել են նավթաարդյունաբերության մի շարք ձեռնարկություններ, պետական եւ մասնավոր հաստատություններ, հազարավոր աշխատավորներ գործազուրկ են դարձել:

Ադրբեջանի արտահանման 95 տոկոսը կազմում են գազը, նավթն ու նավթամթերքները, իսկ երկրի պետբյուջեն 75 տոկոսով ձեւավորվում է էներգակիրների արտահանումից ստացվող եկամուտների հաշվին:

Դեռեւս 2015 թվականի մայիսին Moody's Investors Service միջազգային վարկանիշային գործակալությունը Ադրբեջանում մանաթի արժեզրկում եւ տնտեսության աճի տեմպի նվազում կանխատեսել էր այս տարվա երկրորդ կեսին' կասկած հայտնելով Ադրբեջանի բանկային համակարգի կայունության եւ բանկերի կողմից արժեթղթերի ու ավանդների սպասարկման վերաբերյալ:

Իր հերթին Standart & Poor's վարկային վարկանիշերի ծառայությունը Ադրբեջանի պետական նավթային հիմնադրամի կողմից 2 մլրդ կորստի ֆոնին հիմնադրամի վարկանիշի կանխատեսումը նվազեցրել է մինչեւ «նեգատիվ»:

Միջազգային փորձագետները նշում են, որ նավթի էժանացումը լրջորեն նվազեցրել է Ադրբեջանի ֆինանսական հնարավորությունները: Փորձագետների կարծիքով' 2015 թվականին Ադրբեջանում պետք չէ սպասել 1.9 տոկոսից ավելի տնտեսական աճ: 2014 թվականին Ադրբեջանի ԿԲ-ի արտարժույթի պահուստները նվազել էին 2,78 տոկոսով: