Այսօր Ս. Մարիամ Աստվածածնի ծննդյան օրն է (տեսանյութ)

Ամեն տարի անփոփոխ սեպտեմբերի 8-ին Հայ Առաքելական եկեղեցին նշում է Ս. Մարիամ Աստվածածնի ծննդյան օրը:

Ս. Կույս Մարիամի ծնունդն Աննայից

Ս. Աստվածածնի ծնունդը նկարագրված չէ Աստվածաշունչ մատյանում, այն մեզ փոխանցվել է Եկեղեցու Սրբազան ավանդությամբ: Կույսի ծնողները' Հովակիմն ու Աննան երկար ժամանակ երեխա չէին ունենում, քանի որ վերջինս ամուլ էր: Եվ մի օր, երբ Աննան իջնում է պարտեզ աղոթելու, հանկարծ հայտնվում է Տիրոջ հրեշտակը և ավետում, որ զավակ է ունենալու, ում երանի են տալու բոլոր ազգերը: Աննան գոհություն է հայտնում Աստծուն, որ լսեց իր անդադրում աղոթքների ձայնն ու խղճաց իրեն: Նա խոստանում է իր զավակին Աստծուն նվիրել: Նույն այս տեսիլքը երևում է նաև Հովակիմին' հայտնելով բարի լուրը: Ս. Կույսի հայրը նույնպես փառք է տալիս Բարձրյալին այդ մեծ շնորհին արժանանալու համար և իր ընտիր արջառներից ու ոչխարներից մատաղ է անում' բաժանելով աղքատներին: Աննան հղիանում է, ունենում մի աղջիկ, որին անվանում են Մարիամ, այսինքն' լուսավորյալ: Նա էր այն ընտրյալը երկրի վրա, ում Աստված իր առաքինությունների ու արժանիքների շնորհիվ պատվեց լինելու Աստծու մայրը: Նա տառապեց իր Որդու համար, սակայն երբեք չերկնչեց ու չընդդիմացավ Աստծուն' քաջ գիտակցելով Բարձրյալից իրեն վստահված առաքելության կարևորությունը: Նա առաքինի, հավատավոր մոր, ընտանեկան սրբության պահապանի մարմնացումն է: Հայ Եկեղեցին Աստվածամոր ծննդյան տոնը հաստատուն կերպով տոնում է սեպտեմբերի 8-ին:

Այս տոնը հանդիպել և հանդիպելու է հետևյալ ամսաթվերին՝

2008-09-08, 2009-09-08, 2010-09-08, 2011-09-08, 2012-09-08, 2013-09-08, 2014-09-08, 2015-09-08, 2016-09-08, 2017-09-08, 2018-09-08, 2019-09-08, 2020-09-08, 2021-09-08, 2022-09-08, 2023-09-08, 2024-09-08, 2025-09-08, 2026-09-08, 2027-09-08, 2028-09-08, 2029-09-08, 2030-09-08

Արարատյան Հայրապետական թեմի անունից Ս. Աստվածածնի ծննդյան տոնի առթիվ սիրով շնորհավորում ենք ամենքիս, մասնավորաբար՝ բոլոր հայուհիներին՝ մեր մայրերին ու քույրերին: Այսօր նաև Մարիամ, Մերի, Երանուհի, Սրբուհի, Պերճուհի, Մարի անունը կրողների անվանակոչության տոնն է:

Մենք երանի ենք տալիս Ս. Մարիամին՝այն կնոջն, ով ծնեց Աստծո Որդուն և մաղթում, որ մեր մայրերն ու դուստրերը երանելի լինեն Ս. Աստվածամոր լուսով ու խոնարհությամբ, սիրով ու հավատքով: Եվ նրա հանապազ բարեխոսությամբ ապրենք աստվածահայտ կյանքով:

Արարատյան Հայրապետական թեմի՝ Ս. Աստվածածնի անունը կրող եկեղեցիների հոգևոր հովիվների շնորհավորական ուղերձները՝ ստորև ներկայացված տեսանյութում.

Ներկայացնում ենք նաև տոնի առթիվ Տիգրան Մանսուրյանի, Արամ Սաթյանի, 6 զավակ ունեցող Գոհար Մարգարյանի և 5 զավակ ունեցող Նելլի Հայրապետյանի շնորհավորական խոսքերը:

Տիգրան Մանսուրյան

Սրտանց շնորհավորում եմ բոլոր մեր մայրերին, քույրերին, հավատացյալ համայն հայոց աշխարհին Մարիամ Աստվածածնի Սուրբ ծննդյան փառապանծ տոնի առթիվ:

Մաղթում եմ, որ հայոց աշխարհի բոլոր Մարիամները և առհասարակ, հայ կանայք երջանիկ լինեն:

Թող որ վեհ խորհուրդ ունեցող զգացողությունները, որ մշտապես եկեղեցին մեզ հուշում է առ ներողամտություն, համբերություն, առ հավատ, սեր, միաբանություն, մեզ միասնական պահի մեր արժեքների, սրբությունների՝ մեր եկեղեցու, հայոց գրերի, երաժշտության, հայոց լեզվի շուրջ:

Կոմպոզիտորների միության նախագահ Արամ Սաթյան

Ս. Աստվածածնի ծննդյան տոնն ինձ համար մեծ տոն է: Յուրաքանչյուր անգամ եկեղեցի մտնելով՝ ասում եմ. «Մայրիկ, եկել եմ»: Բոլորս շատ լավ հասկանում ենք, որ հավատի շնորհիվ ենք ազգ դարձել և պահպանվել:

Հավատքով կարելի է ջարդել ամենաբարդ և ամենածանր իրավիճակները:

Սիրով այդ հավատքը կարող է իրական դառնալ, իսկ հույսով հնարավոր է ապրել և ստեղծագործել:

Շնորհավորում եմ բոլորին այս սուրբ տոնի կապակցությամբ և ցանկանում, որ բոլորիս մեջ լինի շատ սեր, հավատանք բարուն:

Գոհար Մարգարյան (6 զավակների մայր)

Սուրբ Մարիամ Աստվածածնի տոնի առթիվ սրտանց շնորհավորում եմ բոլոր մայրերին՝ մաղթելով քաջառողջություն ու մայրական երջանկությամբ առլեցուն երկար տարիների երջանիկ կյանք: Թող Սուրբ Աստվածամոր օրհնանքը լինի աշխարհի բոլոր մայրերի և նրանց զավակների վրա:

Նելլի Հայրապետյան (5 զավակների մայր)

Սուրբ Կույս Մարիամի ծննդյան տոնի էության գիտակցումով եմ ցանկանում շնորհավորել հայոց և ողջ քրիստոնյա աշխարհի մայրերին, քանի որ Տիրամոր ծննդյան աստվածային նախախնամությունը հետագայում շնորհ բերեց մեզ՝ քրիստոնյաներիս, ճանաչելու աշխարհիս անցողիկությունն ու երկնային Երուսաղեմի փառավոր հավիտենականությունը:

Աստվածամոր անքննելի հոգու խոնարհությունն եմ ցանկանում մեզ՝ հայոց մայրերիս, որի դրսևորումներից կցանկանայի լիներ նաև որդեծնությունը՝ հայոց աշխարհի փառավոր պատմության շարունակության կարևոր նախապայմանը: Անդրադառնալով խոնարհությանը' աղոթք ուղղենք սուրբ Մարիամ Աստվածածնին ի բարեխոսություն քրիստոնյային մշտապես ուղեկցող չարի փորձություններից:

Անկանիմք առաջի Քոյ, սուրբ Աստուածածին, եւ աղաչեմք զանարատ զկոյսդ, բարեխօսեա վասն անձանց մերոց, եւ աղաչեա զմիածին Որդիդ փրկել զմեզ ի փորձութենէ եւ յամենայն վտանգից մերոց:

Qahana.am