Պետականամետությունը Մուրադ Մուրադյանի գործունեության առանցքն էր. ԱԺ նախագահ

ՀՀ ԱԺ նախագահ Գալուստ Սահակյանը ցավակցական ուղերձ է հղել Մուրադ Մուրադյանի մահվան կապակցությամբ: Ցավակցական ուղերձում ասվում է.

«Խորապես վշտացած եմ պետական-քաղաքական գործիչ Մուրադ Մուրադյանի մահվան կապակցությամբ:

Պետականամետությունը Մուրադ Մուրադյանի գործունեության առանցքն էր, որին նա հավատարիմ էր մշտապես: Նա կարողանում էր պետության մասին մտածել քաղաքացու, իսկ քաղաքացու մասին՝ պետության շահերից ելնելով, երբեք չտարանջատելով նրանց միմյանցից: Նա այդպիսին էր իր բեղմնավոր աշխատանքային գործունեության ու արժանապատիվ կյանքի ամբողջ ընթացքում՝ անկախ զբաղեցրած պաշտոնից:

Մուրադ Մուրադյանը ստեղծեց Երեւանի պատմության իր բաժինը' որպես նրա լավագույն ժամանակաշրջաններից մեկի անբաժանելի մաս, որպես այդ պատմությունն անմիջականորեն ու գործնականում կերտող եւ իրեն երբեք չզատեց նրանից:

Անկեղծորեն ցավակցում եմ Մուրադ Մուրադյանի ընտանիքին, հարազատներին ու մերձավորներին եւ կիսում նրանց վիշտը»: