Հայաստանի հինգ դպրոցներում կդասավանդվեն նոր առարկաներ

Հայաստանի մի շարք ուսումնական հաստատություններում մեկնարկել է աննախադեպ նոր կրթական նախաձեռնություն: Հինգ կրթական օջախներում այս ուսումնական տարվանից կդասավանդեն «Միկրոէլեկտրոնիկա», «Հեռահաղորդակցության հիմունքներ», «Տեղեկատվական տեխնոլոգիաներ» առարկաները:

«Մեր հավակնությունն է' ունենալ Հայաստանում կրթական բրենդային նոր ծրագիր, որը կարող ենք նաև արտահանել որպես գաղափար և բովանդակություն: Ծրագրի ներդրումը պայմանավորված է տեխնոլոգիական կրթության զարգացման միտումներով: Այն իրականում աննախադեպ է: Նախագիծը, դեռևս չմեկնարկած, արդեն ունի մեծ արձագանքներ մի շարք արտասահմանյան երկրներից և միջազգային կառույցներից, որոնք հետաքրքրված են ծրագրի մոնիթորինգով և ապագայում նաև փորձի փոխանակմամբ»,-«Արմենպրես»-ի փոխանցմամբ' նշեց ՀՀ կրթության և գիտության նախ արարը:

Արմեն Աշոտյանը շեշտեց, որ ծրագիրը պետություն–մասնավոր հատված համագործակցության ամենացայտուն և գործնական օրինակներից մեկն է: «Ծրագրի հիմքում ընկած է հստակ գաղափար: Խոսքը չի գնում հերթական բարեգործործության մասին, սա շրջադարձային նոր համագործակցության ձևաչափ է, որտեղ պետությունը և մասնավորը համատեղ փորձում են կրթության ոլորտի որևէ հատվածում պատասխանատվություն վերցնել նորարարության համար և այն կյանքի կոչել»,-հավելեց նախարարը:

Արմեն Աշոտյանը շեշտեց, որ մոտ ապագայում ԶԼՄ-ների ներկայացուցիչները կհրավիրվեն բաց դասի, որի ընթացքում տեսակոնֆերանսի օգնությամբ հնարավորություն կլինի ծանոթանալ, թե ինչպես է իրականացվում ծրագիրը բոլոր 5 դպրոցներում:

ՀՀ ԿԳՆ հանրակրթության վարչության նախադպրոցական և միջնակարգ կրթության քաղաքականության մշակման և վերլուծության բաժնի պետ Սյուզաննա Մակյանը ներկայացրեց շնորհանդես' նոր առարկաների ներդրման և ընթացքի մասին:

ՀՀ կրթության և գիտության նախարարությունը հաստատել է ՏՀՏ ոլորտի մասնագիտական առարկաների առարկայական չափորոշիչները և մասնագիտական կրթության ծրագրերը: Այդ ծրագիրը, որ փորձարարական է և իրականացվում է 5 ավագ դպրոցներում, միտված է երկրի տնտեսական և գիտատեխնիկական առաջընթացի կարևորագույն բաղադրիչներից և գերակա ուղղություններից մեկը հանդիսացող ՏՀՏ ոլորտի զարգացմանը:

Մինչև 2015-2016 ուսումնական տարվա մեկնարկը, մշակվել են «Հեռահաղորդակցության հիմունքներ» մասնագիտական առարկայի չափորոշիչներն ու ծրագիրը, ինչպես նաև իրականացվել է տվյալ առարկայի ուսուցիչների վերապատրաստումը: Բացի վերը նշվածը, իրականացվում են «Միկրոէլեկտրոնիկա», «Հեռահաղորդակցության հիմունքներ», «Տեղեկատվական տեխնոլոգիաներ» առարկաների լաբորատորիաների ստեղծման աշխատանքները:

Ծրագիրը հատուկ ուշադրություն է հատկացնում հայ երիտասարդների համար առավել լավ հնարավորությունների ստեղծմանը' տեղեկատվական տեխնոլոգիաների, հեռահաղորդակցության կամ միկրոէլետրոնիկայի ոլորտում ապագա մասնագիտական ընտրության համար:

Կրթական ծրագիրն իրականացվում է 5 ուսումնական հաստատություններում' Գյումրու «Ֆոտոն» վարժարանում, «Քվանտ» վարժարանում, Վանաձորի մաթեմատիկայի և բնագիտական առարկաների խորացված ուսուցմամբ հատուկ դպրոցում, Հայաստանի պետական ճարտարագիտական համալսարանի Երևանի ավագ դպրոցում և Արտաշես Շահինյանի անվան ֆիզիկամաթեմատիկական հատուկ դպրոցում: Ծրագիրն իրականացվում է մի շարք մասնավոր կառույցների հետ: