Բնական գազը մուտք գործեց Սոթք

Գեղարքունիքի մարզի Սոթք գյուղում տոնախմբության վերածվեց բնական գազի մուտքը կամ առաջին փորձարկումը: Ինչպես «Արմենպրես»-ին տեղեկացրեց Սոթքի գյուղապետ Կոլիկ Շահսուվարյանը, մոտ երեք տարի տևած և տարբեր փուլերով իրականացված աշխատանքի արդյունքում' վերջապես Սոթքի բնակչությունը բնական գազից օգտվելու հնարավորություն կունենա: «Առաջին 4-5 ընտանիքներն օրերի ընթացքում արդեն իրենց բնակարաններում կվառեն բնական գազը: Մինչև մոտեցող ձնռան սկիզբ ևս 65 ընտանիք կդառնան գազ սպառող բաժանորդներ: Արտաքին ցանցի կառուցման համար ծախսվել է 44 միլիոն դրամ, կառուցվել է 3 հազար 780 գծամետր երկարությամբ արտաքին ցանց: 41 միլիոն դրամ ևս հարկավոր կլինի ծախսել հետայսու' ամբողջ գյուղը գազաֆիկացնելու համար: Կփորձենք այս տարի ևս միջոցներ ուղղել մյուս թաղամասերի ներքին ցանցի կառուցմանը, որպեսզի մոտակա ժամանակներում բնական գազից օգտվելու հնարավորություն ունենան Սոթքի բոլոր 270 ընտանիքները»,- նշեց համայնքի ղեկավարը:

Համայնքի ղեկավարի և ավագանու որոշմամբ' տեղական բյուջեի միջոցներով բնական գազի ներքին ցանց կկառուցվի Վոլոդյա Ծատուրյանի բազմազավակ ընտանիքի համար: «Հնարավորության դեպքում կաշխատենք աջակցել նաև կարիքավոր այլ ընտանիքների: Կարևորն այն է, որ տևական ջանքերից հետո կարողացանք բնական գազը Սոթք հասցնել, ինչն արդեն նշանակում է կյանքի որակի բարելավում, մաքուր կենցաղի ապահովում»,- հավելեց Կոլիկ Շահսուվարյանը:

Խոսրով Խլղաթյան