Հայաստանը ներկայացնող Լեոնորան SOFIA GRAND PRIX-2015 միջազգային մրցույթում արժանացել է «Գրան Պրի» մրցանակի

Սոֆիայում կայացած «Գրան Պրի 2015» (SOFIA GRAND PRIX-2015) միջազգային մրցույթում «Գրան Պրի» մրցանակին է արժանացել Հայաստանը ներկայացնող երգչուհի Լեոնորան: Սեպտեմբերի 13-17-ին կայացած մրցույթում 18-ից բարձր տարիքային խմբի «Դասական վոկալ» անվանակարգում եռագույնի ներքո հանդես է եկել ծնունդով գյումրեցի, լիրիկ սոպրանո Լեոնորան: Այս նախագծին մասնակցելու առաջարկը երգչուհին ստացել էր «Կատարողական արվեստի աշխարհի ասոցիացիա»-ի կողմից, իսկ Սոֆիա մեկնելու ծախսերը հոգացել է հովանավորը՝ ֆրանսահայ Լուսինե Հակոբյանը:

«Մրցույթը բավական թեժ էր մինչև վերջին րոպեն, լավագույն երգիչներ են մասնակցել 10 երկրներից, բայց Լեոնորային հաջողվել է «Դասական վոկալ» անվանակարգում գրավել առաջին հորիզոնականը, իսկ ընդհանուր մրցույթում ճանաչվել է բացարձակ հաղթող»,- այս մասին «Արմենպրես»-ին տեղեկացրեց Լեոնորայի ամուսինը՝ Վիգեն Թանաշեանը, ով նաև երգչուհու պրոդյուսերն է:

Որպես մրցույթին մասնակցելու պարտադիր պայման՝ յուրաքանչյուր մասնակից պետք է ներկայանար երկու կատարմամբ, որոնցից մեկը պետք է լիներ երգչի հայրենի երկրի կոմպոզիտորի ստեղծագործություն, մյուսը՝ օտար: Հայ երգչուհին ներկայացրեց Կոմիտասի «Կռունկ» և Լուիջի Արդիտի "Il Bacio" (Համբյուր) ստեղծագործությունները: «Քվեարկությունը փակ էր, բայց առաջին իսկ ելույթից հետո՝ խոսքը Կոմիտասի մասին է, բոլորը մոտենում ու շնորհավորում էին՝ ասելով, որ շատ են հավանել ինչպես ստեղծագործությունը, այնպես էլ կատարումը»,- նշեց Վիգեն Թանաշեանը՝ շնորհակալություն հայտնելով ինչպես «Կատարողական արվեստի աշխարհի ասոցիացիային», այնպես էլ «Գրան Պրի 2015» (SOFIA GRAND PRIX-2015) միջազգային մրցույթի կազմկոմիտեին: «Ամեն ինչ հրաշալի էր: Գյումրի մենք վերադառնում ենք բաձառիկ տպավորություններով ու մեծ հաղթանակով»,- հավելեց Վիգեն Թանաշեանը:

SOFIA GRAND PRIX-2015 մրցույթը բավական հայտնի է ոչ միայն Բուլղարիայում, այլ նաև շատ երկրներում: Միայն այս տարի մրցույթի մասնակցության հայտեր են ներկայացվել Իտալիայից, Իսպանիայից, Ուկրաինայից, Սերբիայից, Ռումինիայից և Հայաստանից: Մրցույթն անցկացվում է «Sprint production»-ի և «Artvoices» Sofia երաժշտական գործակալության նախաձեռնությամբ՝ Սոֆիայի քաղաքապետարանի և Բուլղարիայի ազգային հեռուստատեսության հովանավորությամբ: Մրցույթն անցկացվում է ինչպես սիրողական, այնպես էլ պրոֆեսիոնալ արվեստագետների շրջանում: Լեոնորայի իրական անունն Արևիկ է, նա սովորել է Երևանի Կոմիտասի անվան կոնսերվատորիայի դասական վոկալ բաժնում: Այս ընթացքում Լեոնորան տարբեր երկրներում ու բեմերում է հանդես եկել, ունեցել է մենահամերգներ, սակայն հայրենի քաղաքում երգչուհուն հիշում են «Անուշ» օպերայի 100-ամյակի առթիվ բեմադրված «Անուշ»-ի գլխավոր հերոսուհու դերերգով: Վերջին տարիներին երգչուհու համերգային ծրագրով, բեմական կեցվածքով ու մնացած բոլոր խնդիրներով զբաղվում է Լեոնորայի ամուսինը՝ բեյրութահայ պրոդյուսեր Վիգեն Թանաշեանը:

Արմենուհի Մխոյան