ՀՀ նոր Սահմանադրությունը մարդակենտրոն բնույթ է ունենալու. Գագիկ Մելիքյան

Սահմանադրական բարեփոխումները մարդակենտրոն բնույթ ունեն և լուրջ առաջընթաց են լինելու իշխանության արդյունավետության բարձրացման առումով: Լրագրողների հետ սեպտեմբերի 24-ին կայացած հանդիպմանն այսպիսի կարծիք հայտնեց Ազգային ժողովի ՀՀԿ խմբակցության քարտուղար Գագիկ Մելիքյանը: «Ակնհայտ է, որ 1995 թվականին ընդունված Սահմանադրությունը մարդակենտրոն իշխանություն չապահովեց, քանի որ այն անձնակենտրոն էր, որտեղ հիմնականում անտեսված էին մարդու իրավունքները: Ես կարծում եմ, որ Սահմանադրական բարեփոխումների առումով առկա է քաղաքական կոնսոլիդացիա, և նույնիսկ այն քաղաքական ուժերը, որոնք դեմ էին արտահայտվում այդ փոփոխություններին (ՀԱԿ-ի առաջարկությունը ԱԺ նախագահի ընրության հետ կապված), մասնակցում են Սահմանադրական բարեփոխումների քննարկումներին»,- «Արմենպրես»-ի հաղորդմամբ' հայտնեց նա' հավելելով, որ Սահմանադրական բարեփոխումների համաժողովրդական հանրաքվեն հավանաբար տեղի է ունենալու ընթացիկ տարվա դեկտեմբերի սկզբին:

Նա նկատեց, որ Սահմանադրական բարեփոխումներից հետո Ազգային ժողովում ընդգրկված բոլոր քաղաքական ուժերը մասնակցելու են բոլոր քվերակություններին, քանի որ յուրաքանչյուր որոշման համար անհրաժեշտ է լինելու խորհրդարանական ուժերի մեկ երրորդի ձայերը: «Սահմանադրական բարեփոխումներից հետո Կենտրոնական բանկի, Վերահսկիչ պալատի, ԿԸՀ-ի նախագահի, ՀԾԿՀ-ի նախագահի և Վճռաբեկ դատարանի նախագահի թեկնածուների ընտրությունը պետք է կատարվի խորհրդարանի կողմից պատգամավորների ձայների երեք հինգերորդով, ինչն առաջընթաց քայլ է»,- շեշտեց Մելիքյանը'ընդգծելով, որ քաղաքացիական հասարակությունը ևս կարող է մասնակցել կարևոր հարցերի քննարկմանը հանրային կարևոր խնդիրների շուրջ:

Անդրադառնալով «Ոչ»-ի ճակատին' նա խորհուրդ տվեց այդ ճակատի մասնակիցներին ծանոթանալ Սահմանադրական բարեփոխումների նախագծին և բովանդակային առաջարկություններ ներկայացնել հանձնաժողովին:

Հայաստանի Հանրապետության նախագահին առընթեր սահմանադրական բարեփոխումների մասնագիտական հանձնաժողովը օգոստոսի 20-ի ամփոփիչ նիստում հաստատել է Սահմանադրությունում փոփոխություններ կատարելու մասին նախագիծը՝ կից հիմնավորումներով, և այն ներկայացրել Հայաստանի Հանրապետության Նախագահին:

Նախագահը սահմանադրական բարեփոխումների շուրջ քննարկումներ է սկսել խորհրդարանական և արտախորհրդարանական քաղաքական ուժերի հետ. Սերժ Սարգսյանը արդեն հանդիպել է մի շարք կուսակցությունների ներկայացուցիչների և Հանրային խորհրդի անդամների հետ:

Ազգային ժողովում սեպտեմբերի 15-ից մեկնարել են Սահմանադրական բարեփոխումների վերաբերյալ քննարկումները: