Եվրախորհրդի անդամ յուրաքանչյուր երկիր պարտավոր է հարգել համաեվրոպական արժեքները. Լայնենի խոսքն Ադրբեջանի մասին

Բրյուսելում կայացած Միջազգային եվրոպական շարժման գագաթնաժողովի ընթացքում շարժման նախագահ Յո Լայնենը (Jo Leinen) Ադրբեջանի իշխանությանը կոչ է արել հստակորեն հետևել եվրոպական արժեքներին: Նա ասել է, որ Եվրախորհրդի անդամ յուրաքանչյուր երկիր պարտավոր է իմանալ և հարգել համաեվրոպական արժեքները հենց երկրի ներսում:

Ադրբեջանի վերաբերյալ վերջին հաղորդումները և տեղեկություններն առաջացրել են Միջազգային եվրոպական շարժման անդամների վրդովմունքը և մտահոգությունը: Շարժումը հստակեցրել է, որ Ադրբեջանի հետ ընթացող մերձեցման և ասոցացման համաձայնագրերի բանակցության հետագա ընթացքում երկու կողմերի միջև պետք է հստակ լինի արժեքների ճշմարիտ ըմբռնումը:

«Երբ ես որպես Միջազգային եվրոպական շարժման նորընտիր նախագահ այցելեցի Ադրբեջան, ես բացահայտեցի մի երկիր, որը ցանկանում է ավելի սերտ հարաբերություն ունենալ Եվրոպայի հետ: Մենք՝ բոլորս, պետք է Ադրբեջանի և Եվրոպայի միջև ստեղծենք ուժեղ և արդյունավետ կապեր՝ հիմնված ընդհանուր արժեքների վրա»,- ասել է Յո Լայնենը:

Ադրբեջանում հիմնված Եվրոպական շարժման ազգային խորհուրդ ՀԿ-ն առաջինն է, որն ունի եվրոպական ուղղվածություն: Այն նպատակ է դրել անդրադառնալ հասարակության և քաղաքականության բոլոր հատվածներին/ոլորտներին: «Ես շատ բարձր եմ գնահատում բազմաթիվ երիտասարդների նախաձեռնությամբ կյանքի կոչված այս գաղափարը»,- ասել է Լայնենը: