Անտարբեր նախարարը

Պայմանավորված վերջին տարիներին Հայաստանում անկում ապրող տնտեսությամբ ու սոցիալ-տնտեսական իրավիճակի վատթարացմամբ' նոր վերելք է գրանցում այնպիսի բացասական երևույթ, ինչպիսին մուրացկանությունն է. վիճակագրությունը փաստում է, որ հատկապես արագ են աճում մուրացկանության տեմպերն անչափահասների շրջանում: Խոսել կոնկրետ թվերի մասին այս պարագայում սխալ կլիներ, սակայն նույնիսկ պաշտոնական վիճակագրությունը փաստում է, որ վերջին տարիներին գրեթե կրկնապատկվել է այդ թիվը: Եթե 2014-ին մուրացկան երեխաների թիվը, նույն ԱՎԾ-ի համաձայն, 7-ն էր, ապա այսօր այն կազմում է մոտ 15:

Ինչևիցե, երևույթն իրոք որ սարսափելի է, ու ոչ միայն խոսում է աղքատության տեմպերի մեծացման, այլև պետության կողմից սխալ սոցիալական քաղաքականության մասին. Արտեմ Ասատրյանի նախարարությունն, ակնհայտ է, ինչ-որ բան ինչ-որ տեղ սխալ է անում: Դժվար թե ցանկության դեպքում պետությունը չկարողանա լուծել մի քանի տասնսյակ երեխաների հարցերը: Ասել, թե նախարարությունը փող չունի, ոչ մի կերպ չի կարելի, քանի որ մուրացկանության խնդիրը լուծելը կապված չէ միլիարդավոր դրամների հետ, իսկ երեխաների պարագայում ընդհանրապես չնչին միջոցների հարց է: Սակայն ինչպես երևում է, մարդիկ նախընտրում են պետական բյուջեի միջոցները շատ ավելի «կարևոր» բաների վրա ծախսել, քան այն խնդրի լուծման, որի մասին խոսք գնաց:

Ցավոք, կարող ենք վստահաբար ասել, որ հաշվի առնելով զարգացման այն տեմպերը, որոնք բնորոշ են մեր երկրին հիմա ու առաջիկա տարիներին ևս հատուկ են լինելու, մուրացկանությունը միմիայն աճ է արձանագրելու, իսկ այդ ընթացքում հայրենի որոշ չինովնկներ շարունակելու են փոր գցել ի հաշիվ պետական միջոցների. Հայաստանում ընդունված պրակտիկա է, ինչ կարող ես անել…

Դավիթ ԲԱԲԱՆՈՎ