Բաքվի բարոյական հաղթանա՞կը...

ԵԱՀԿ-ն ու Հայաստանի ԱԳՆ-ն հայտարարել են, որ ԵԱՀԿ Երեւանի գրասենյակը կփակվի, քանի որ այդպես էլ չի հաջողվել հաղթահարել Ադրբեջանի բողոքը:

Բաքուն պահանջել է Երեւանում ԵԱՀԿ առաքելության փակում, իսկ քանի որ ԵԱՀԿ գրասենյակը որեւէ երկրում կարող է տեղակայվել կոնսենսուսով, Բաքվի պահանջով Երեւանի գրասենյակը, փաստացի, կփակվի: Ավելի վաղ՝ Բաքուն փակել էր ԵԱՀԿ գրասենյակը նաեւ իր մոտ, երբ ժողովրդավարության հարցերի առնչությամբ սրվեց հարաբերությունն Արեւմուտքի հետ: Գաղտնիք չէ, որ ԱՀԿ նախագահությունը, մասնակից երկրները, քարտուղարությունը' բոլորը սատարում են ԵԱՀԿ երևանյան գրասենյակի գործունեությանը, և միայն Ադրբեջանն է, որ, չարաշահելով կազմակերպության կոնսենսուսի սկզբունքը, որի համաձայն՝ նույնիսկ մեկ երկիր կարող է խափանել որոշումների ընդունումը, դեմ է հանդես գալիս ԵԱՀԿ երևանյան գրասենյակի գործունեության շարունակմանը, դրանով իսկ հակադրվելով ամբողջ կազմակերպությանը:

Բաքվում ԵԱՀԿ գրասենյակի փակումից հետո, փաստացի արգելափակելով նաև երևանյան գրասենյակի գործունեությունը, Ադրբեջանը զրկում է ԵԱՀԿ-ին՝ Հարավային Կովկասում լիարժեք առաքելության ներկայությունից, ինչը, բնականաբար, չի կարող բացասաբար չանդրադառնալ ոչ միայն մեր տարածաշրջանում ԵԱՀԿ գործունեության, այլև ընդհանրապես կազմակերպության և նրա կառույցների վրա: Իրականում՝ ԵԱՀԿ Երևանյան գրասենյակի փակումը կարելի է դիտարկել իբրև Ադրբեջանի բարոյական հաղթանակ, սակայն միայն բարոյական, քանի որ գործնականում սա Բաքվի սուլթանին որևէ դիվիդենտ չի տալիս: Ավելին՝ Ալիևը լուրջ մտահոգվելու կարիք ունի, քանի որ այս քայլով փաստացի ԵԱՀԿ-ն հետ քաշեց իր գրասենյակը, միևնույն ժամանակ չդրեց հայկական զինուժի հետ քաշման պահանջ: Ադրբեջանը ԵԱՀԿ-ին մեղադրում է ստատուս-քվոյի պահպանմանը սատարելու մեջ և ինքն իրեն դնում ծայրահեղ  ոչ նպաստավոր իրավիճակում: Ապրիլից հետո Ադրբեջանը հասկացավ, որ պատերազմը չի կարող հանդիսանալ հակամարտության կարգավորման ուղի՝ երկարաժամկետ հեռանկարում:

Հայկական զինուժն ապրիլին ձախողեց այդ ճանապարհով ստատուս-քվոն փոխելու Ադրբեջանի մտադրությունը: Այս տապալումից հետո միջազգային հանրությունը մի շարք լրջագույն մեսիջներ հղեց Ալիևին՝ կոչ անելով հրաժարվել խնդրի լուծման ռազմական տարբերակից: Արված հայտարարությունների երանգը և շեշտադրումները չէին կարող չհիասթափեցնել Բաքվի կրտսեր սուլթանին. դա է պատճառը, որ վերջինիս փոքր-ինչ մխիթարելու համար ԵԱՀԿ-ն ի վերջո որոշում կայացրեց փակել իր երևանյան գրասենյակը:

Ստելլա ԽԱՉԱՏՐՅԱՆ