Արդարադատության իրականացման խայտառակ տարբերակ՝ անունը Պերմյակով

Մինչ Հայաստանի արդարադատության համակարգից ջանք ու եռանդ չեն խնայում հերքելու Պերմյակովի՝ Ռուսաստանին արտահանձնելու մասին տեղեկությունները, Ռուսաստանից եկավ պաշտոնական հաստատում: Գյումրիում Ավետիսյանների 7 հոգանոց ընտանիքին դաժանաբար սպանած Վալերի Պերմյակովն իր պատիժը կկրի Ռուսաստանի Դաշնությունում:

Դոնի Ռոստովում տեղակայված Հյուսիս-կովկասյան շրջանային զինվորական դատարանի ներկայացուցիչը «Ռիա Նովոստի» գործակալությանը հայտնել է, որ Վալերի Պերմյակովն իր պատիժը կշարունակի կրել ՌԴ տարածքում: Այստեղ շատ կարևոր է նկատել, որ Պերմյակովն, իր կատարած ոճիրից հետո՝ ոչ մի րոպե չի եղել ՀՀ արդարադատության վերահսկողության տակ, և փաստացի, մինչ օրս իր պատիժը չի կրել Հայաստանում, այլ՝ 102 րդ ռազմաբազայում, որը թեև ՀՀ տարածքում է, բայց համարվում է ՌԴ տարածք:

Ճիշտ է, իր կատարած ոճիրի համար նրան դատապարտել են Հայաստանի Հանրապետության օրենքներով, և պետական մեղադրողը մեղադրանք առաջադրելիս պաշտպանել է Հայաստանի Հանրապետության քաղաքացիների շահերը, բայց դատաքննությունն էլ տեղի էր ունենում ՌԴ տարածք համարվող ռուսական ռազմաբազայում: Աննախադեպ էր նաև այն, որ դատավորն ամեն անգամ նիստ անելիս իր հետ դատարան էր տանում մուրճը, դրոշն ու գերբը, որպեսզի ռազմաբազայում երևա, որ դատաքննությունն իրականացնում է Հայաստանի Հանրապետության դատական մարմինը:

Պերմյակովը դատապարտվել է 2 հանցանքի համար: Ռազմաբազան լքելու համար ՌԴ դատարանի կողմից դատապարտվել է 10 տարվա ազատազրկման, իսկ Ավետիսյաններին սպանելու համար՝ ցմահ ազատազրկման: Այս պահին արդարադատության պատասխանատուները, Պերմյակովի արտահանձման մասին խոսելիս, շեշտում են այն հանգամանքը, որ նա դատապարտվել է նաև ՌԴ դատարանի կողմից: Բայց համեմատելու աղերս չունեն դասալքությունն ու 7 հոգանոց ընտանիքին սպանելը:

Ինչևէ, գալով Պերմյակովի արտահանձնմանը, փաստենք, որ այս քայլով Հայաստանի Հանրապետությունը հերթական խայտառակ նվաստացմանն է գնում: Հայաստանի Հանրապետությունը, որպես անկախ և սուվերեն պետություն, չի կարողանում պատժել այն տականքին, որը սպանել է իր քաղաքացիներին:

Իսկ ով կարող է երաշխավորել, որ Պերմյակովը ՌԴ-ում պատիժ կրելուց մի քանի տարի անց, երբ կմոռացվի այդ դեպքը, ազատ չի արձակվի: Ոչ ոք ոչ մի երաշխիք տալ չի կարող: Այսուհետ՝ Պերմյակովը դառնալու է ՌԴ իշխանության վերահսկողության տակ գտնվող դատապարտյալ: Սաֆարովը՝ մեզ օրինակ: Հիշում ենք՝ ինչ եղավ, երբ Հունգարիան նրան արտահանձնեց Ադրբեջանին: Սաֆարովը սպանել էր սպային՝ քնած ժամանակ, իսկ Պերմյակովը՝ 7 հոգու, անգամ՝ օրորոցում քնած երեխային:

Եթե տարիներ անց՝ Պերմյակովը, օրինակ, «գժի թղթով» ազատվի ՌԴ բանտից, ո՞ւմ վրա ենք ձու և լոլիկ նետելու: Ինքներս մե՞ր: Այս անգամ ստահակին հանձնում ենք մեր ձեռքով: Սա Հայաստանի անկախ պատմության արդարադատության ամենախայտառակ որոշումն է և նվաստացումը:

Արսեն Սանամյան