Սերժ Սարգսյանը զրոյացնում է ռիսկը…

Կառավարության ապագա կազմը կարծես հետզհետե նշմարվում է: Ճիշտ է՝ դեռևս վաղ է կոնկրետ նշել, թե ովքեր են լինելու ապագա նախարարները, քանի որ դեռևս գործընթացն ընթացքի մեջ է, բայց արդեն իսկ հավաստի լուրեր են շրջանառվում այն մասին, որ, դիցուք, Արդարադատության նախարարի թեկնածության հարցում նախագահականում հստակ որոշում են ընդունել. ՀՀ արդարադատության նախարարի ամենահավանական թեկնածուն, ասում են, իրավաբանական գիտությունների թեկնածու, ՀՀ նախագահի իրավական հարցերով օգնական Հրայր Ղուկասյանն է:

Թե հատկապես ինչով է պայմանավորված հենց Ղուկասյանի թեկնածության վրա կանգ առնելու համապատասխան որոշումն, առավել քան ակնհայտ է: Բանն այն է, որ ցանկացած երկրում իշխանությունները հիմնվում են գլխավորապես ուժային կառույցների վրա: Հետևաբար՝ նախագահականի ցանկությունը՝ հերթական ուժային կառույցում տեսնելու սեփական մարդուն, մեկին, ով 100%-ով վստահություն կվայելի անձամբ նախագահ Սարգսյանի կողմից, զերծ կլինի քաղաքական ինտրիգներից և, առհասարակ, քաղաքականությունից՝ երկրի համար քաղաքականապես գերլարված այս ժամանակներում, միանգամայն բնական է. Արփինե Հովհաննիսյանն այս առումով խոցելի էր ու նրա փոփոխությունը միանգամայն բնական պետք է համարել:

Այսպիսով՝ Ղուկասյանի նշանակմամբ Նախագահն իր կատարյալ վերահսկողության տակ է առնում բոլոր ուժային կառույցներն անխտիր՝ ունենալով այնտեղ բառացիորեն սեփական մարդկանց. անձերի, որոնք ոչ մի կերպ չեն կարող ո՛չ ներգարվվել քաղաքական ապագա ինտրիգներում, ո՛չ էլ խնդիրներ ստեղծել նախագահականի համար, ինչը, հատկապես հաշվի առնելով 2018-ի սարերի հետևում չգտնվելու իրողությունը, չափազանց կարևորվում է Սերժ Սարգսյանի կողմից:

Դավիթ ԲԱԲԱՆՈՎ