Մարտունի քաղաքում մեկնարկել են հանրային լողափի հիմնման աշխատանքները

Գեղարքունիքի մարզի Մարտունի քաղաքում մեկնարկել են հանրային լողափի հիմնման աշխատանքները՝ Մարտունու քաղաքապետ Արմեն Ավետիսյանի և ավագանու առանձին անդամների նախաձեռնությամբ: Ինչպես տեղեկացրել են Մարտունու քաղաքապետարանի աշխատակազմից, շուրջ տաս օր է, ինչ Մարտունու նախկին հանգստյան տան շենքի հարող և Սևանա լճի ափամերձ տարածքում ընթանում են լողափի մաքրման, ավազալցման, համահարթեցման, ճահճացած հատվածների ջրահեռացման և չորացման աշխատանքներ:

«Համայնքի ղեկավար Արմեն Ավետիսյանի նախաձեռնությանը ի սկզբանե միացել է ավագանու անդամ Տիգրան Ստեփանյանը, ով անվարձահատույց տրամադրել է իրեն պատկանող շինտեխնիկան։ Իրենց սեփական տեխնիկաներով նախաձեռնությանը միացել են նաև Մխիթար Պողոսյանը և իր որդի Տիգրանը։ Որոշակի աջակցություն են ցուցաբերել նաև Մարտունի քաղաքի բնակիչներ Արծրուն Ավետիսյանը և Արսեն Խլոյանը: Առաջին օրերին կատարվել են ափամերձ տարածքի մաքրման աշխատանքներ, քանի որ տարածքով մեկ կուտակված էին պլաստիկ ու ապակյա շշեր, աղբաբլուրներ: Ապա հետևել են ավազի մա րման, լիցքի և համահարթեցման աշխատանքները, որոնց հաջորդելու են դրենաժային կառույցների միջոցով լողափի հարակից տարածքների ճահիճների չորացման աշխատանքները: Մենք նախատեսում ենք կառուցել հանրային լողափ՝ իր հանդերձարանով, կրակարանով, սանհանգույցով, վոլեյբոլի և մարզական այլ խաղերի հրապարակով: Բարեկարգման ներկա աշխատանքներում համայնքապետարանի բյուջեից որևէ գումար դուրս չի գրվել, միջոցները ներդրել են քաղաքապետ Արմեն Ավետիսյանը և նախաձեռնությանը միացած քաղաքացիները»,-ներկայացրել է Մարտունու քաղաքապետի տեղակալ Հովսեփ Տոնոյանը:

Մարտունու քաղաքապետ Արմեն Ավետիսյանը հավաստել է, որ այս տարվա ամռանը հանրային լողափը կծառայի ինչպես Մարտունի քաղաքի բնակիչներին, այնպես էլ դրսից եկած հյուրերին, հովեկներին կամ զբոսաշրջիկներին:«Խորհրդային տարիներին Մարտունին զբոսաշրջության հարուստ ավանդներ ուներ, նրա անունը հայտնի էր աշխարհի ամենատարբեր երկրներում: Բայց ԽՍՀՄ փլուզումից հետո, երբ տնտեսության հետ մեկտեղ անկում ապրեց զբոսաշրջությունը, տասնամյակներ շարունակ Մարտունու հանգստյան տունը, մարդաշ տ լողափը ոչ միայն հիմնովին լքվել, այլ նաև թաղվել էր աղբակույտերի մեջ, Սևանի մակարդակի բարձրացման հետևանքով վերածվել ճահճուտների: Փոխարենը մարտունեցիներն իրենց ամառային հանգիստը ստիպված էին լինում փնտրել մեր մարզի այլ քաղաքների լողափերում կամ այլ երկրներում: Նախկին հանգստյան գոտին վերականգնելու և շահագործելու համար մեծ միջոցներ ու ջանքեր են պահանջվում, մեր անձնական միջոցներից արդեն մոտ 5 միլիոն դրամ ծախսվել է, հետագայում էլ կպահանջվեն նոր միջոցներ՝ սպասարկող տաղավարների, պահանջված այլ կառույցների հիմնման համար: Կարծում եմ, ո կկարողանանք նաև նպաստել բիզնես միջավայրի ճիշտ ձևավորմանը, որպեսզի մեր հիմնած հանրային լողափը և հանգստյան գոտին լինեն գրավիչ թե տեղի բնակիչների, թե դրսից եկած հովեկների ու զբոսաշրջիկների համար, ապահովեն մշտական գործունեություն: Հանրային լողափից բոլորը կօգտվեն անվճար, իսկ ահա այլ ծառայությունների մատուցման պահանջի դեպքում վճարը կսահմանվի սպասարկող կառույցների կողմից: Հանգստյան գոտու և հանրային լողափի հիմնումը նաև կնպաստեն նոր աշխատատեղերի ստեղծմանը: Զբոսաշրջությունը պետք է դարձնենք մեր քաղաքի զարգացման հիմնական առանձնաշն որհներից մեկը»,- նշել է Մարտունու քաղաքապետը: