Ադրբեջանն ունի հարուստ փորձ՝ սեփական բնակչությանը տանջանքների ենթարկելու․ Դավիթ Բաբայան (տեսանյութ)

Սահմանում իրավիճակը նորմալ է, վերահսկելի, արտառոց զարգացումներ տեղի չեն ունենում։ Այս մասին ԼՈւՐԵՐ․com-ի թղթակցի հետ զրույցում ասաց ԼՂ նախագահի աշխատակազմի ղեկավարի տեղակալ Դավիթ Բաբայանը։

Անդրադառնալով հակառակորդի ապատեղեկատվություն տարածելուն, Բաբայանը նշեց, որ երկու զոհերի հետ Արցախի ՊԲ-ն որևէ կապ չունի և ադրբեջանական կողմի տարածած լուրերը նրանց իրականացրած սցենարն է․ «Մենք ողբում ենք յուրաքանչյուր զոհի համար, սակայն երեխայի մահվան հետ Արցախը որևէ կապ չունի։ Մենք դատապարտում ենք նման գործողությունները։ Ադրբեջանական կողմն ունի հարուստ փորձ՝ սեփական բնակչությանը տանջանքների ենթարկելու և այն ներկայացնելու որպես հայական կողմի արարք։ Դա տեղի է ունեցել մասնավորապես Խոջալուում, երբ նրանք ինքնացեղասպանություն են իրականացրել, դա տեղի է ունեցել Ապրիլյան պատերազմի ժամանակ, երբ որ 300․000 ադրբեջանցիներ, որոնք լքել են սահմանամերձ բնակավայրերը, նրանց տները թալանելիս նույն ադրբեջանական բանակի զինծառայողները, թուրքական ծայրահեղականները, իսլամական պետության գրոհայինները, եթե այնտեղ հանդիպում էին որևէ մեկի՝ նրանց բռնաբարում, սպանում էին և ներկայացնում որպես հայկական զոհեր»,- ասաց Բաբայանը։

Նրա կարծիքով՝ չի բացառվում, որ 2-ամյա երեխայի մահվան դեպքը ևս եղել է այդպիսի բարբարոսության հետևանք․ «Երեխայի մահը ողբերգություն է և պետք է միջազգային համապատասխան հետաքննություն իրականացվի և ապացուցվի, որ Արցախի ՊԲ-ն կապ չունի դրա հետ»,-ասաց Դավիթ Բաբայանը։

Բաբայանը նշեց, որ Ալխանլուն սահմանամերձ գյուղ է, որտեղ ադրբեջանցիները տեղակայել են իրենց զորամիավորումները և բնակիչներին օգտագործում են որպես վահան․ «Մենք, տեսնելով, որ բնակավայրերից են գնդակոծում, փոխադարձ կրակ չէինք բացում, քանի որ գիտակցում էինք, որ կարող են քաղաքացիական զոհեր լինել։ Մենք կրակում էինք այն ուղղությամբ, որոնք հեռու էին քաղաքացիական բնակչությունից։ Ըստ երևույթին՝ կրկին տեղի է ունեցել ադրբեջանցիների հերթական սցենարը, որը փորձում են բարդել մեզ վրա»,- ընդգծեց նա։

Սոնա Հարությունյան