Հանրային խորհրդի նախագահն ընդունել է Բելգիայի Թագավորության դեսպանին

ՀՀ Հանրային խորհրդի նախագահ Վազգեն Մանուկյանը նոյեմբերի 30-ին ընդունել է Հայաստանի Հանրապետությունում Բելգիայի Թագավորության արտակարգ և լիազոր դեսպան Ժան-Արթուր Ռեժիբոյին (նստավայրը՝ Մոսկվա) և դեսպանատան առաջին քարտուղար Վան Կերեբրոեքին: Հանդիպմանը մասնակցել է նաև ՀՀ Հանրային խորհրդի անդամ, Բելգիայի թագավորության պատվավոր հյուպատոս Գրիգոր Բադիրյանը: Այս մասին տեղեկացրին ՀՀ Հանրային խորհրդից:

Կողմերն անդրադարձել են Հայաստան-ԵՄ հարաբերություններին, մասնավորապես օրերս Հայաստանի ու Եվրամիության միջև ստորագրված Համապարփակ և ընդլայնված գործընկերության համաձայնագրին՝ հույս հայտնելով, որ նոր համաձայնագիրը է´լ ավելի կսերտացնի Եվրամիության հետ Հայաստանի գործընկերային հարաբերությունները: Քննարկվել է նաև ԵԱՏՄ-ում Հայաստանի մասնակցությունն ու դերը: 

Անդրադառնալով «բրեքսիթին»ն և Ուկրաինայի օրինակներին՝ ՀԽ նախագահն ընդգծել է, որ «կամ´, կա´մ» քաղաքականությունը ցանկալի է փոխարինել «և´, և´»-ով, ինչն առավել արդյունավետ ճանապարհ է, և Հայաստանը գնացել է հենց այդ ճանապարհով: 

Քննարկվել է նաև ՀՀ Հանրային խորհրդի գործունեությունն ու աշխարհում համանման կառույցների դերը: Բելգիայի դեսպանը, որը ժամանակին գործունեություն է ծավալել Բելգիայի համապատասխան կառույցներում, ընդգծել է այդ կառույցների կարևորությունը երկրի զարգացման գործում: 

Կողմերն անդրադարձել են նաև Ղարաբաղյան հակամարտության խնդրին: Վազգեն Մանուկյանն ընդգծել է, որ խնդրի կարգավորման գործում էական նշանակություն ունի Արցախի կարգավիճակի հարցը, և եթե Ադրբեջանը քաղաքական կամք ունենա ընդունելու Արցախի անկախ լինելու իրավունքը, ապա մյուս հարցերը, որոնք վերաբերում են տարածքներին, փախստականներին և այլն, հնարավոր կլինի արագորեն լուծել բանակցությունների միջոցով: 

Անդրադարձ է եղել նաև Հայաստան-Թուրքիա հարաբերություններին: