Ո՞նց է աղքատը քիչ ծախսում. ՀՀԿ-ական պատգամավոր

«Գեղարքունիքի մարզի բնակիչների բավականին մեծ մասն արտագնա աշխատանքով է զբաղված: Գնում, ետ են գալիս և իրենց ընտանիքի բարեկեցությունը լուծում են արտագնա աշխատանքի գնալով, սակայն չեն գնում այնտեղ մնալու համար»,-ԼՈւՐԵՐ.com-ի հետ զրույցում ասաց Գեղարքունիքի նախկին մարզպետ, ԱԺ ՀՀԿ խմբակցության պատգամավոր Ռաֆիկ Գրիգորյանն՝ անդրադառնալով Գեղարքունիքի մարզում առկա արտագաղթի մեծ տեմպերին: 

Հարցին՝ արտագնա աշխատանքի գնալու թիվ մեկ դրդապատճառ համարվող թանկացումներին ինչպե՞ս է վերաբերվում, ՀՀԿ-ական պատգամավորը պատասխանեց. «Ցանկացած թանկացում էլ ցանկալի չէ: Սակայն, պետք է նշեմ, որ միայն Հայաստանում չէ, որ թանկացումներ են սկսվել: Հայաստանում նկատվող թանկացումներով զբաղվում են համապատասխան մարմինները, որոնք ուսումնասիրել  են և տվել իրենց գնահատականն այդ թանկացումների վերաբերյալ»:

Ռաֆիկ Գրիգորյանից նաև հետաքրքվեցինք՝ ինչպե՞ս է վերաբերվում իր կուսակից ընկերոջ՝ ՀՀԿ-ական մեկ այլ պատգամավոր Հակոբ Հակոբյանի՝ աղքատը քիչ է ծախսում արտահայտությանը: 

Գրիգորյանին այս մեջբերումը զայրացրեց: Վերջինս նշեց, որ հարցն արդեն իսկ տհաճ է, և տհաճությամբ էլ պատասխանեց. «Ո՞նց է աղքատը քիչ ծախսում: Յուրաքանչյուրն էլ ուզում է, որ իր երեխան լավ սնվի: Ես համամիտ չեմ այդ կարծիքի հետ»: 

Իսկ երբ Գրիգորյանին հիշեցրինք, որ նույն Հակոբյանը նաև հավելել է, որ աղքատ մարդկանց մոտ սովորություն կա, որ նրանք խուսափում են թանկացած կամ թանկ ապրանք գնելուց, նշեց. «Ես տեղյակ  չեմ, չեմ կարդացել, չգիտեմ՝ ինչ է ասել»:

Հիշեցնենք, որ աղքատը այսպես, թե այնպես քիչ է ծախսում «թեզի պաշտպանությամբ» հանդես  է եկել նաև ՀՀԿ-ական մեկ այլ պատգամավոր՝ Խոսրով Հարությունյանը:

Պատգամավորներ Հարությունյանի խոսքն ու Հակոբյանի հարցազրույցի տեսաձայնագրությունը ստորև՝ առանց մեկնաբանության:

Խոսրով Հարությունյան. «Պատկերացրեք՝ կա ընտանիք, որը միայն կարտոֆիլ է օգտագործում: Հիմա, եթե միսը թանկ է կամ էժան, ինքը միևնույն է՝ գումար չունի միս գնելու, շարունակում է կարտոֆիլ օգտագործել… Ես շատ պարզ բան եմ ասում՝ անկասկած կա սպառողների մի խավ, որոնց եկամուտների ծավալը բավական ցածր է, այնքան ցածր է, որ անկախ ապրանքների գնից՝ ի վիճակի չեն այդ ապրանքատեսակներն օգտագործել իրենց ամենօրյա զամբյուղում»:

Աղավնի Սուքիասյան