Ռազմական ուժի կիրառումը չի բերի հակամարտության կարգավորմանը. Ռուսաստան, ԱՄՆ, Ֆրանսիա

Ռուսաստանի, ԱՄՆ և Ֆրանսիայի նախագահները Ադրբեջանի և Հայաստանի նախագահներին կոչ են անում՝ արագացնել խնդրի կարգավորման հիմնարար սկզբունքների համաձայնեցումը։

Այդ մասին նշված է G20 գագաթնաժողովում երեք երկրների առաջնորդների կողմից ընդունված համատեղ հայտարարության մեջ։

«Մենք ափսոսում ենք, որ Ադրբեջանի և Հայաստանի նախագահները չեն նախաձեռնում այն վճռական քայլերը, որոնց առարկայնացմանը մեր երկրները կոչ են արել 2011–ի մաիսի 26-ին՝ Դովիլում կատարած համատեղ հայտարարության մեջ»,- ասված է հայտարարության մեջ։

Համանախագահ երկրների առաջնորդները Հայաստանի և Ադրբեջանի նախագահներին կոչ են արել կատարել 2012–ի հունվարի 23-ին Սոչիի հայտարարության մեջ պարունակվող ԼՂ հակամարտության կարգավորման հիմնարար սկզբունքների համաձայնեցման վերաբերյալ պարտավորությունները։

Բացի դրանից՝ Ռուսաստանը, ԱՄՆ-ը և Ֆրանսիան Հայաստանի և Ադրբեջանի առաջնորդներին կոչ են արել ԼՂ հակամարտության կարգավորման համար զերծ մնալ ռազմական ուժի կիրառումից և ամբողջությամբ օգտագործել ԵԱՀԿ Մինսկի խմբի համանախագահների միջնորդական աջակցությունը։

«Ռազմական ուժի կիրառումը չի բերի հակամարտության կարգավորմանը, այլ միայն կերկարաձգի տանջանքները և դժբախտությունները, որոնց երկար ժամանակի ընթացքում ենթարկվում են այդ տարածաշրջանում ապրող ժողովուրդները։ Միայն բանակցությունների ճանապարհով խաղաղ կարգավորումը հնարավորություն կտա ելք գտնել ստեղծված իրադրությունից և ապահովել տարածաշրջանի ապագան ու բարգավաճումը»,- ասված է համատեղ հայտարարության մեջ։