Չպետք է վերադառնանք միջկուսակցական կռիվներին. Րաֆֆի Հովհաննիսյան (տեսանյութ)

«Ժառանգություն» կուսակցության առաջնորդ Րաֆֆի Հովհաննիսյանը լրագրողների հետ զրույցում նշեց, թե կուսակցությունում հնարավոր արտահերթ ընտրություններին մասնակցելու հարց չի քննարկվել: Նա կարևոր համարեց, որ այս փուլում վերադարձ չպետք է լինի միջկուսակցական կռիվներին և այդ ամենից պետք է վեր կանգնել:

««Ժառանգությունը»  միաձուլվել է ժողովրդին վայր է դրել իր կուսակացական դրոշը, դա մեր հավատամքն է, միայն թե երկիրը, քաղաքացին լինի ճշմարտության, ազատության ճանապարհի վրա, տակավին «Ժառանգությունը» նման քննարկում չի արել:  Ես հույս ունեմ՝ համաժողովրդական շարժումը կշարունակվի այսպես՝  համաժողովրդական ընտրություններին եւ չենք վերադառնա նեղ կուսակցական ցուցակների եւ կռիվների: Դրա համար շատ բան կախված է ժողովրդից, շարժումից, ըստ այդմ «Ժառանգությունը» կկողմնորոշվի, մեր նախընտրությունն այն է, որ համաժողովրդականը մնա համաժողովրդական»,- ասաց նա:

Րաֆֆի Հովհաննիսյանը նշեց՝ նոր Կառավարության հետ հույսեր է կապում. «Տակավին չենք հասել մեր երազած ափը, բայց քայլքի մեջ ենք: 25-26 տարի առաջ պայքարել ենք նաեւ այս օրվա համար: Լավագույնն  եմ մաղթում նոր Կառավարությանը եւ  հույս եմ տածում, որ կշարունակվի որպես համաժողովրդական միասնական շարժում եւ անցյալի սխալներից   սովորելով մենք չենք վերադառնա նեղ կուսակցական կռիվների, այլ կօգտագործենք այս ոգեղեն պահը միացնելու մեր ուժը ընդարձակելու եւ խորացնելու հայրենիքը եւ իր ուժը: Մենք այդ նույն պայքարի մեջ ենք, պետք է ազատ անկախ երկիր կառուցենք, ես միշտ պատիվ եմ տալիս , փառք եմ տալիս թե շարքային քաղաքացիներին, թե զինվորներին, թե առաջնորդներին եւ հիմա արդեն հերթափոխը երիտասարդությանն է եւ բոլոր սերունդները պետք է  կաթիլ դնեն, որ կարողանանք այդ արդարությունը վերադարձնել մեր ժողովրդին»,- ասաց նա:

Մանրամասները՝ Armlur.am-ի տեսանյութում: