Մարզպետը ցանկալի մարդ չէ. ցուցարարները նրան չլսեցին (տեսանյութ)

Ինչպես տեղեկացրել էինք, այսօր բողոքի ակցիա էր սկսվել Վայոց Ձորի Եղեգիս համայնքում. ցուցարարները փակել էին ճանապարհը և պահանջում էին կառուցվող 4 փոքր ՀԷԿ-երի  շինարարական աշխատանքների դադարեցումը, նաև՝ իրենց չսատարող համայնքապետի հրաժարականը:

Ավելի ուշ, ակցիայի մասնակիցների հետ բանակցելու համար, այնտեղ էր գնացել  Վայոց Ձորի նորանշանակ մարզպետ  Արագած Սաղաթելյանը:

«Գյուղացիները հնարավորություն չտվեցին մարզպետին նորմալ արտահայտվելու, քանի որ պնդում էին, որ նա նույնպես իրենց նախընտրած թեկնածուն չէ, ուստի՝ ցանկալի մարդ  չէ իրենց համար: Չնայած իր նկատմամաբ դրսևորված  անբարյացակամ վերաբերմունքին, Արագած Սաղաթելյանը փորձում էր հանգստացնել տեղացիներին, բացատրել, որ համապատասխան լիազորություն ունեցող պետական մարմնի աշխատակիցները կգան հանդիպման, իսկ ցուցարարները հակադարձում էին, որ իրենք արդեն քանիցս լսել են այդ խոստումները և հենց հիմա են պահանջում հանդիպումը ու չեն պատրաստվում բացել ճանապարհը»,- ԼՈւՐԵՐ.com-ի թղթակցի հետ զրույցում պատմեց ականատես Էդգար Վարդանյանը: 

Նա նաև ավելացրեց, որ  բողոքի ակցիայի մասնակիցների շարքերում տեղեկություն էր տարածվել, որ Տարածքային կառավարման նախարարությունից պատրաստվում են վաղն առավոտյան գալ ցուցարարների հետ հանդիպման և կոչ են անում բացել ճանապարհները, սակայն ցուցարարները դարձյալ տեղի չեն տվել: Իրավիճակը նույնն է՝ ցույցը շարունակվում է:

Հիշեցնենք, որ օրեր առաջ ԼՈւՐԵՐ.com-ը գրել էր, որ վայոցձորցիները համաձայն չեն իրենց  մարզպետի պաշտոնում տեսնել Արագած Սաղաթելյանին: