Արցախի նախագահը պետք է արագ որոշում կայացնի՝ ոստիկանապետին ու ԱԱԾ պետի տեղակալին ազատի աշխատանքից

«Առաջին օրը սկսվածը բողոք էր՝ կենցաղային վեճի հետ կապված հանգամանքով, բողոք էր հատուկ նշանակության ջոկատի դեմ, որի որոշ ծառայակիցներ ներգրավվել էին կենցաղային վեճի մեջ»,- գնահատելով Արցախում վերջին օրերին տեղի ունեցած բողոքի ակցիաները՝ «Առաջին լրատվական»-ի հետ զրույցում ասաց Արցախի Ազգային ժողովի «Վերածնունդ» խմբակցության պատգամավոր Հայկ Խանումյանը:

Վերջինիս խոսքով՝ հաջորդ օրն արդեն տեղի ունեցածը արդարացի բողոք էր. «Ուժային կառույցների ղեկավարները, տասնյակ տարիների վկայությունների արդյունքում, գործել են ապօրինությունների դաշտում, ինչպես նաև ուժային կառույցներն օգտագործվել են տարբեր ոչ օրինական նպատակներով: Խոսքը մասնավորապես ԱԱԾ տնօրենի տեղակալ Գագիկ Սարգսյանի և ոստիկանապետ Կամո Աղաջանյանի մասին է»:

Հայկ Խանումյանը կարծում է, որ նախագահը պետք է արագ որոշում կայացնի առնվազն այս երկու պաշտոնյաների ազատման վերաբերյալ. «Սակայն քանի որ ժամանակի խնդիր կա, բողոքի ակցիաների համակարգող խորհուրդը, լսելով նաև ՀՀ վարչապետի կոչին, որոշեց ցրել բողոքի ակցիաները և ժամանակ տալ նախագահին համապատասխան որոշում կայացնելու»:

Պատգամավորը նշեց, որ ինքը չի վստահում Արցախի իրավապահներին: «Սակայն այժմ նախաքննություն է գնում, և միակ տարբերակը դրան ակտիվորեն հետևելն է, որովհետև միջամտելու որևէ գործիքակազմ օրենքով չկա»,- ասաց նա՝ հավելելով, որ իրենք լրջագույն խնդիր ունեն գործադիր, օրենսդիր և դատական մարմինների տարանջատման հարցում:

Հայկ Խանումյանը, ելնելով ցուցարարների վարքագծից, ընդգծեց. «Փաստ է, որ Նիկոլ Փաշինյանը բացարձակ հեղինակություն է նաև Արցախում»: Նա իր տարակուսանքը հայտնեց այն առնչությամբ, որ Բակո Սահակյանը զանգահարում էր ՀՀ վարչապետին, նախկին նախագահներին, կաթողիկոսներին. «Նա պետք է անմիջապես որոշում կայացներ»:

Մանրամասները՝ տեսանյութում: