Սա ի՞նչ է ի վերջո՝ ծրագի՞ր, թե՞ զրույց սուրճի սեղանի շուրջ

Ինչպես տեղեկացրել ենք, այսօր՝ հունիսի 7-ին, ԱԺ արտահերթ նիստում քննարկվում է Փաշինյանի կառավարության ծրագիրը։  Ելույթի խոսքով  հանդես եկավ նաև Աժ փոխնագահ Էդուարդ Շարմազանովը, ով կառավարության ծրագիրը  համեմատեց երազանքների հուշագրի հետ։

Նա նաև նկատեց, որ ԱԺ արտահերթ նիստում քննարկման առարկան ոչ թե նախկին իշխանությունների քաղաքական գնահատկանն է, այլ կառավարության ծրագիրը։

«Հարգելի խորհրդարան, ներկայացված փաստաթղթում առկա են ցանկություններ, նպատակներ, երազանանքեր բայց ոչ քաղաքական ծանրակշիռ ծրագիր։ Սա նպատակների և   երազանքների հուշագիր է, որտեղ չկա նպատակների իրակացման գործիքակազմ, կոնկրետ քայլերի հաջորդականություն, չկան ժամկետներ և ակնկալվող արդյունքների ցուցանիշներ»։

Շարմազանովը նաև նկատեց, որ ներկայացված փաստաթղթում չկան թվեր տնտեսական աճի վերաբերյալ:

«Ո՞րն է Ձեր կառավարության տնտեսական աճի թիրախը՝ 5,7,10,15 լավ մեկ տոկոս, չկա գրված, հրաժարվե՞լ եք թռիչքային զարգացման գաղափարից, ինչո՞ւ: Հարգելի գործընկերներ, վերջերս կառավարության ղեկավարը նշել է, որ Հայաստանում որևէ աղքատ մարդ չի լինելու: Համոզված եմ, որ բոլորս էլ դա ենք ուզում, բայց հեռու լինելով քաղաքական ռոմանտիզմից, այնուհանդերձ, ուզում եմ իմանալ՝ որքա՞ն է լինելու Ձեր կառավարության օրոք աղքատության կրճատումը: Դարձյալ թիվ չկա: Իսկ սա խնդիր է, որ բոլորիս է մտահոգում»։

Շարմազանովը անդրադարձավ նաև ծրագրում առկա հետևյալ մտքին՝ «Հեղափոխական տեմպերով պետք է զարգացնել նաև գյուղատնտեսությունը», որի առնչությամբ հետաքրքվեց՝ «Ի՞նչ է սա նշանակում, արդյո՞ք կարելի է համարել, որ այլևս քաղաքական իրավիճակի փոփոխության արդյունքում խոշոր եղջերավորները կրկնակի կամ եռակի հեղափոխական կաթնատվություն են ապահովելու»։

Նոր կառավարության արտաքին քաղաքականության առումով Շարմազանովը նկատեց, որ նորերը բռնել են իրենց ճանապարհը այս ուղությամբ, բայց նկատեց, որ ծրագրում ԵՄ անդամ երկրների  հետ հարաբերությունների մասին  կոնկրետ խոսք չկա. «Եթե նախկինում ԵՄ-ի հետ գործընկերության համաձայնագիրը Դուք համարում էիք ջուր, ապա այսօր ԵՄ-ի հետ հարաբերությունների խորացումը կառավարության արտաքին քաղաքական կարևոր ուղղություններից է: Սակայն ծրագրում չկա որևէ հիշատակում ԵՄ անդամն երկրների, հատկապես` Ֆրանսիայի և Գերմանիայի, ինչու չէ նաև Հունաստանի և Կիպրոսի հետ հարաբերությունների մասին: Ոչինչ, որ Իրանի և Վրաստանի մասին փաստաթղթում ասված է ճիշտ այնքան, որքան Հնդկաստանի մասին, բայց կասե՞ք խնդրեմ՝ ի՞նչ է նշանակում «զարգացնել այնպիսի առանձնահատուկ հարաբերություններ, որոնք հատուկ են ամենատարբեր ոլորտներում սերտորեն համագործակցող անմիջական հարևաններին: Խնդրում եմ բացատրել` սա ի՞նչ է ի վերջո՝ ծրագի՞ր, թե՞ զրույց սուրճի սեղանի շուրջ»:

Խոսելով  ծրագրում մատնանշված հայենադարձության տեմպերի զարգացման մասին՝ Շարմազանովը չհասկացավ,  թե ինչ չափանիշներով է դա արվելու և հավելեց․ «Կներեք, բայց Դուք Ձեր գրածը գոնե մեկ անգամ բարձրաձայն ընթերցե՞լ եք, հայրենադարձություն եք հարուցում որպեսզի ճշտեք Ձեր դերակատարո՞ւմը, սա զավեեշտալի է պարզապես»:

Տեսանյութը՝ Factor.am-ի: