«Դուխով աշխատելը՝ էդ մոդայիկ բառով, շատ կարևոր է, բայց․․․». Սպարտակ Սեյրանյան

Այսօր, ԱԺ արտահերթ նիստում, որտեղ քննարկման էր դրվել Նիկոլ Փաշինյանի կառավարության առաջարկած ծրագիրը, ելույթով հանդես եկավ  նաև ՀՅԴ խմբակցության պատգամավոր Սպարտակ Սեյրանյանը, ով կառավարության ծրագիրն ավելի շատ համեմատեց տեսլականի հետ։

«Իմ քաղաքական գործունեության ընթացքում ես շատ ծրագրեր եմ տեսել՝ թե՛ մի քանի անգամ ծավալով մեծ, թե՛ մի քանի անգամ ծավալով փոքր, թե՛ թվերով լեցուն, թե՛ առանց թվերի: Ունեմ խորին համոզմունք, որ դրանք էական նշանակություն չունեն։ Էական նշանակություն ունի կառավարության հռչակած քաղաքականության արդյունավետությունը և հաշվետվության ժամանակ այն փաստարկները, որոնցում կառավարությունը ներկայացնում է  իր կատարածի և չկատարածի հաշվեկշիռը։ Այս առումով՝ քննարկվող փաստաթուղթն ինձ համար տեսլական է, այն տեսլականը, որով կառավարությունը ներկայացնում է առաջիկա ամիսների իր գործունեությունը»,-ասաց Սպարտակ Սեյրանյանը։

Նա նկատեց, որ դրական է կառավարության գործունեության ուղղվածությունը, համաձայն որի՝  ծրագրի մեջ առաջարկված մեթոդաբանությունը հիմնվում է այն բանի վրա, որ կառավարությունը քայլեր է անում ոչ թե իր հնարավորությունների, այլ իր նպատակադրումների սահմաններում։

«Հետևաբար, դրանց իրականացման համար անհրաժեշտ միջոցները պետք է թվարկվեն    այդ ծրագիր-ժամանկացույցի մեջ, պետք  է թվարկվեն այն գործիքներն ու գործիքակազմը, որոնց շնորհիվ այդ ծրագիրը  կյանքի  է կոչվելու։ Կառավարության կայացրած  որոշումների վերաբերյալ  պետք են  հստակ ժամկետներ, միջանկյալ արդյունքների ներկայացում, որպեսզի այդ որոշումները չմնանան կառավարության կաբինետում կամ նախարարության միջանցքներում»,- նշեց Սպարտակ Սեյրանյանը։

«Կարծում եմ Ձեր աշխատանքների մեջ հաշվի կառնեք մի կարևոր հանգամանք էլ ՝ «դուխով» աշխատելը՝ էդ մոդայիկ բառով, շատ կարևոր է, բայց կարծում եմ՝ շատ ավելի մեծ դուխ և խոհեմություն է  պահանջում սխալներն ընդունելը, դրանք սրբագրելը և բոլորին լսելը՝ խորհուրդների և առաջարկների մասով»,-ամփոփեց պատգամավորը։

Լիլիթ Հակոբյան

Տեսանյութը՝ 1․in.am-ի