Նույն թելն է թելվում...

Պետական եկամուտների կոմիտեի աշխատակից Կարեն Կարապետյանի փաստաբան Տիգրան Հայրապետյանն ահազանգել էր, որ ՊԵԿ նախագահ Դավիթ Անանյանը պատժում է հանցագործությունների և կոռուպցիայի մասին՝ ՀՀ վարչապետ Նիկոլ Փաշինյանին տեղեկություններ տրամադրողներին: 

Խոսքը՝ ՊԵԿ օպերատիվ վարչության պետ Կարեն Կարապետյանի կատարած որոշ բացահայտումների մասին է, որոնք,  ըստ փաստաբանի, մի շարք պաշտոնյաների «զայրույթն էր առաջացրել»: Փաստաբանի պնդմամբ` չի ուշացել ՊԵԿ նախագահի հրամանը՝ Կարապետյանի գործունեությունը կասեցնելու և աշխատասենյակը փակելու վերաբերյալ: Սակայն, ուշագրավ է այն հանգամանքը, որ նույն Կարեն Կարապետյանի անունը, դեռևս նախորդ իշխանության տարիներից, բազմիցս կապվել է ոչ թե կոռուպցիոն սխեմաների բացահայտման, այլ դրանց մեջ ներգրավված լինելու մեջ:

Պակաս ուշագրավ չէ այն հանգամանքը, որ դեռևս ընդդիմադիր ուժի ներկայացուցիչ Նիկոլ Փաշինյանը խորհրդարանում անընդհատ ահազանգում էր այն մասին, թե Սերժ Սարգսյանի ենթակաները ճիշտ չեն զեկուցում երկրում տեղի ունեցող կոռուպցիոն սարդոստայնների և ապօրինի գործարքների մասին: Կարծես թե, այժմ նույն թելն  է թելվում:

Կոռուպցիան և անարդարությունն արմատախիլ անելու նպատակով իշանություն բերված քաղաքական այս ուժի թերացումները գնալով ավելի տեսանելի են դառնում, ինչի մասին մամուլն ամեն օր ահազանգում է: Ամենավառ օրինակներից է ՊԵԿ-ի՝ վերջին ժամանակահատվածում վարած քաղաքականությունը, այն է՝ ոչինչ չանելը, քանի որ վերջինիս ակտիվ գործունեությունը տևեց մի քանի ամիս:

Իհարկե, վերջերս ՊԵԿ-ը հայտարարեց նաև, որ 2016-2017 թվականների ընթացքում «Նաիրի Ինշուրանս» ապահովագրական ընկերությունում խոշոր չափերի հարկերից խուսափելու դեպք է հայտնաբերվել, այսինքն` ընկերությունը պետությանը պատճառել է մոտ 200 միլիոն դրամ գումարի վնաս (առանց տույժ և տուգանքների) և ընկերության դեմ քրեական գործ հարուցեց: Այնուհետև ՊԵԿ-ը հայտարարեց նաև, որ պետությանը պատճառած վնասը վերականգնելու պարագայում «Նաիրի Ինշուրանս»-ի դեմ հարուցված քրգործը կկարճվի:

Չուշացավ «Նաիրի Ինշուրանս» ապահովագրական ընկերության պատասխանը, որտեղ նշում էր, որ  ՊԵԿ-ի հայտարարության մասին ընկերությունը տեղեկացել է մամուլից և պաշտոնապես հայտարարեցին, որ  ՊԵԿ աշխատակիցները որևէ անգամ չեն այցելել «Նաիրի Ինշուրանս» ապահովագրական ընկերություն: Նկատենք, որ «Նաիրի Ինշուրնս» ապահովագրական ընկերությունը վերջին շրջանում կապվում էր ՀՀ 2-րդ նախագահ Ռոբերտ Քոչարյանի որդիների անվան հետ: Այս տարօրինակ հայտարարության և դրան տրված պատասխանից ստացվում է, որ հանրային դժգոհությունները նվազեցնելու և բարձր օղակներին գոհացնելու նպատակով շահարկվում են հանրության ուշադրության կենտրոնում գտնվող անձերին:

Արմինե ՄԻՔԱՅԵԼՅԱՆ