Եթե փաստեր ունի, թող դատախազություն հայտարարություն ներկայացնի․ Արթուր Խաչատրյան

«Սոֆյա Հովսեփյանը մեղադրանք է ներկայացրել, ես էլ ասում եմ, որ կցանկանայի ապացույցները տեսնել: Դաշնակցությունը եթերային կառույց չէ, բաղկացած է մարդկանցից: Հետևաբար, մարդիկ են մարզը տարիներ շարունակ ավիրել: Այլ տրամաբանություն չկա, կա ընկալման տարբերություն»,- ԼՈւՐԵՐ․com-ի հետ զրույցում ասաց Շիրակի նախկին մարզպետ, ՀՅԴ-ական Արթուր Խաչատրյանը՝ անդրադառնալով «Իմ քայլը» դաշինքի անդամ, Շիրակի մարզից ԱԺ պատգամավոր ընտրված Շիրակի նախկին փոխմարզպետ Սոֆյա Հովսեփյանի՝ ՀՅԴ-ի հասցեին հնչեցրած մեղադրանքներին, ըստ որոնց՝ վերջինս ավիրել է Շիրակի մարզն ու երկիրը: 

Արթուր Խաչատրյանն էլ իր հերթին զրպարտանք է որակել կուսակցության հասցեին արված Հովսեփյանի հայտարարությունը՝ ընդունելով այն որպես անձնական վիրավորանք։

Նրա խոսքով՝ եթե մի մարդ տարիներ շարունակ մի կուսակցության պատվավոր անդամ է, բնական է, որ անձնական վիրավորանք կընդունի հավաքականության հասցեին հնչած մեղադրանքը․ «Եթե նկատի ուներ կոնկրետ անձի, կարող էր ասել՝ կուսակցության այսինչ անդամը, ոչ թե նշեր հավաքականությանը, որն ունի հազարավոր անդամներ՝ աշխարհի 30-ից ավել երկրում։ Եթե կարծիք ունի 2 կամ 100 անդամի վերաբերյալ՝ չի կարելի դա տարածել բոլոր անդամների վրա: Չգիտեմ «Իմ քայլ»-ում այդպես է, թե ոչ, մեզ մոտ այդպես է։ Եթե փաստեր ունի, թող դատախազություն հայտարարություն ներկայացնի, որ կուսակցությունից այսինչ մարդիկ այսինչ բանն են արել։ Փաստ ունենալ և չարձագանքելն էլ ճիշտ չէ»,- նշեց Խաչատրյանը։

Խաչատրյանն ասաց, որ Սոֆյա Հովսեփյանի հետ, որպես այդպիսին, քննարկում չի եղել. մի քանի բառ փոխանակել են անձնական նամակով։ 

Սոնա Հարությունյան