Մի բնակարանամուտի կեղծ պատմություն

Ադրբեջան 24 Հունվար, 2019 23:37

Ադրբեջանի նախագահ Իլհամ Ալիևը նախորդ տարվա դեկտեմբերի 18-ին Բաքվում մասնակցել է զինված ուժերի զինծառայողներին և նրանց ընտանիքների անդամներին նոր բնակարանների տրամադրման արարողությանը: Ներկա են եղել Զաքիր Հասանովը, զինված ուժերի գլխավոր շտաբի պետ Նաջմեդդին Սադիկովը և մի շարք բարձրաստիճան այլ պաշտոնյաներ, որոնց հետ միասին Ալիևը ծանոթացել է նոր բնակարանների պայմաններին, հանդիպել զինված ուժերի բարձրաստիճան սպայակազմի ու նրանց ընտանիքների հետ, հանձնել բնակարանների բանալիները:

Առաջին հայացքից թվում է, թե սա նորմալ գործընթաց է և երկրի գերագույն հրամանատարը լուծում է զինծառայողներին բնակարաններով ապահովելու խնդիրը, սակայն, ուշադիր զննելով նկարները, ակնհայտ է դառնում, որ շենքը արտաքինից նորակառույց է (նկ.1), սակայն, երբ ուսումնասիրում ենք բնակարանների ներքին կառուցապատումն ու հարդարանքը, պարզ է դառնում, որ դրանք ոչ թե նորակառույց շենքի բնակարաններ են, այլ վաղուցվա շինություններ են` նախկինում բնակեցված, կոսմետիկ վերանորոգումով «լավ քողարկված»:

Նկ. 1: Նորակառույց շենք: Պատուհաններում բացակայում են վարագույրները, մինչդեռ մնացած բոլոր նկարներում բնակարանները բնակեցված են` վարագույրները բոլոր նկարներում առկա են:

Այսպիսով՝ չի լինում այնպես, որ նույնատիպ նորակառույց շինության առաստաղը մի տեղ լինի լայն, իսկ մեկ այլ՝ նույնատիպ սենյակում` նեղ, ինչպես նաև չեն կարող տարբեր բնակարանների հյուրասենյակների ջահերը (նկ.3, 4) և կահույքը լինել նույնը (նկ.5, 6):

Նկ. 2: Նշված հատվածում կամ բորբոս է, կամ` կեղտ:

Նկ. 3, 4: Ջահերը, սեղան-աթոռները նույն են:

Նկ. 5, 6: Առաստաղները երկու բնակարանում էլ տարբեր լայնություն ունեն: Սեղան-աթոռները նույնն են, երկու բնակարանի հյուրասենյակում առկա են նկարներ:

Ուշագրավ է այն, որ բնակարանի տերերը բացակայում են, ինչը հուշում է, որ սրանք ոչ թե նորակառույց, այլ` սպայական հանրակացարանի բնակարաններ են:

Եվ, վերջապես, որտե՞ղ են բնակարանի տերերը, ինչու՞ գերագույն ղեկավարության հետ լուսանկարներ չունեն բնակարաններում (նկ. 5, 6): Ու՞ր են բնակարանները մուտք գործող երջանիկ ընտանիքները: Պակաս ուշագրավ չէ այն փաստը, որ նկարներում պատկերված զինծառայողներից և կանանցից բացի չկան երեխաներ (նկ. 5, 6):

Նկ. 7, 8: Նկարներում բացակայում են երեխաները, իսկ կանայք բոլոր նկարներում կանգնած են առանձին: Տպավորություն է ստեղծվում, որ ընտանիքներ չկան:

Մինչ Ադրբեջանի նախագահ Իլհամ Ալիևը զբաղված է բնակարաններ «կառուցել-հատկացնելու» շոուներով և դրանով փորձում է վերականգնել իր՝ օր-օրի անկում ապրող հեղինակությունը, ժողովրդի բողոքի ալիքը գնալով մեծանում է: Ադրբեջանի բնակչությունն այլևս չի ցանկանում ապրել պատերազմական իրավիճակի մեջ և կռվել հայերի դեմ:

Ալիևի կողմից կազմակերպված այս բեմականությունը միայն մեկ նպատակի համար է ծառայում՝ համոզել սեփական ժողովրդին, որ պետության բյուջեից բանակի համար նախատեսվող միլիարդավոր դոլարները ծառայում են իրենց նպատակին և հատկացվում են զինծառայողների համար բնակարաններ կառուցելուն, ինչպես նաև նրանց սոցիալական խնդիրները լուծելուն: