Ճիշտ կլիներ, որ պարոն Աշոտյանը ընդհանրապես լռեր. Ալեն Սիմոնյան

Երեկ Արցախում մեկնարկել է Հայաստանի Անվտանգության խորհրդի նիստը, որին մասնակցել են ՀՀ վարչապետ Նիկոլ Փաշինյանը և Արցախի Հանրապետության նախագահ ՝ Բակո Սահակյանը։  Նիստի ընթացքում արված ելույթների, Ադրբեջանական կողմի պատասխանի և այլ հարցերի շուրջ ԼՈՒՐԵՐ․com-ը զրուցել է ՀՀ ԱԺ փոխնախագահ Ալեն Սիմոնյանի հետ։

Իր խոսքում Ալեն Սիմոնյանը նշեց, որ բարձր է գնահատում երեկ նիստի ընթացքում արված Նիկոլ Փաշինյանի ելույթը։

-ՀՀԿ փոխնախագահ Արմեն Աշոտյանը երեկ իր ֆեյսբուքյան էջում բացասական մեկնաբանություններ էր տալիս և ասում, որ 10 ամսում սա վարչապետի ամենավատ ելույթն էր։ Ինչպե՞ս եք վերաբերվում նախկին իշխանությունների մեկնաբանություններին՝ Արցախի հարցի և վարչապետի ելույթի վերաբերյալ։

-Անկեղծ ասած վաղուց չեմ հետևում Արմեն Աշոտյանի ելույթներին։ Իր հետ 6-րդ գումարման Ազգային ժողովում աշխատելուց հետո, բավականին հիասթափված եմ։ Միտում եմ տեսել ամեն ինչ փչացնելու, եթե նույնիսկ դա իրականության հետ կապ չունի։ Եվ այդ միտումը, նպատակը ունեցող գործչի ելույթները, ինձ համար կորցրեցին իրենց հետաքրքրությունը։ Քանի որ չեմ հետևում, տեղյակ չեմ ինչի մասին է խոսքը։ Ինձ ավելի շատ կզարմացներ, եթե Դուք ասեիք, որ պարոն Աշոտյանը դրական է արձագանքել։ Դա ինձ կզարմացներ։ Ճիշտ կլիներ, որ նա ընդհանրապես լռեր։

-Երեկ հայտարարությամբ հանդես եկավ նաև Ադրբեջանի նախագահ Իլհամ Ալիևը, բայց այդ հայտարարության մեջ խաղաղասիրական միտումները ակնհայտ բացակայում էին։ Այս պարագայում Հայաստանը վարում է դրանց հասնելու քաղաքականություն։ Ինչպե՞ս կմեկնաբանեք այս ամենը, և արդյո՞ք միակողմանի խաղաղասիրությունը կբերի դրական կամ բացասական փոփոխություների

-Հայաստանը, հայ ժողովուրդը, Արցախի ժողովուրդը հաղթող ժողովուրդ են և բնական է, որ մենք ավելի շատ ենք միտված խոսելու ոչ թե սպառնալիքի լեզվով, այլ խոսելու մեր դիրքերից, որոնք ունենք։ Ինչ վերաբերվում է Ալիևի հայտարարությանը, դա ներքին շուկայի համար արված հերթական հայտարարությունն է։ Բայց նա շատ լավ գիտի, և բոլորը շատ լավ գիտեն, թե պատերազմի պարագայում ինչ հետևանքներ կլինեն  մեր հակառակորդի համար։ Միանշանակ պատերազմը և պատերազմական հորդորները ամենաբացասական բանն են, որ կարող է լինել, մանավանդ այս փուլում։

Մեր հարցին, թե Ադրբեջանում անցկացվող զորավարժությունները, և Ալիևի հայտարարությունը  կարո՞ղ են սպառնալիք լինել Հայաստանի համար։ Ալեն Սիմոնյանը պատասխանեց, որ դրանք նույնպես արվում են ներքին շուկայի համար․ «Ադրբեջանական կողմը կարող է անընդհատ զորավարժություններ անել, դա իրենց խնդիրն է»,- նշեց Սիմոնյանը։

Պատգամավորը նաև հավելեց, որ վստահ է՝ հայ և Արցախի ժողովրդի, բանակի ուժի վրա․ «Պատերազմի վտանգ միշտ էլ կա, այլ հարց է՝ դու պատրաստ ես, թե՝ ոչ։ Կարծում եմ, որ մենք, ամենակարևորը՝ հոգեպես միշտ պատրաստ ենք պաշտպանել մեր տունը։ Բայց բնական է, որ ամեն ինչ պետք է անել դրանից խուսափելու համար, որովհետև ամեն դեպքում պատերազմում հաղթող կողմ չի լինում»։

Ասպրամ ՓԱՐՍԱԴԱՆՅԱՆ