Եթե Ռոբերտ Քոչարյանն արտակարգ դրություն չմտցներ՝ կասեին Քոչարյանն անգործության մատնվեց. պաշտպան

Ռոբերտ Քոչարյանը միշտ էլ ելույթով է հանդես եկել, երբեք չի թաքցրել ինչ կա: Այս մասին այսօր լրագրողների հետ զրույցում նշեց ՀՀ երկրորդ նախագահ Ռոբերտ Քոչարյանի պաշտպաններից Ռուբեն Սահակյանը:

«Նա ճիշտ է եղել, երբ հրավիրել է խորհրդակցություն՝ իմանալով հանդերձ և ստանալով հաղորդագրություն Ազգային անվտանգության ղեկավարի կողմից, որ երկրապահը ոտքի է կանգնել, որ փորձում են միանալ ժողովրդին, որ մարդիկ զինված են: Դուք էլ լսած կլինեք, ես անձամբ տեսել եմ, որ խոսքը գեներալ Մանվելի, գեներալ Գագիկ Մելքոնյանի մասին է: Վերջերս էլ կարդացել եմ, որ նա մի տեղ ասում է, որ հատուկ գնդի 80 տոկոսը միացել էր ցուցարարներին: Այսինքն՝ զինվորականները միացել էին ցուցարարներին: Ի՞նչ իրավունքով»,- ասաց պաշտպանը:

Վերջինս նկատեց, որ եթե Ռոբերտ Քոչարյանը արտակարգ դրություն չմտցներ՝ զոհերն ավելի շատ կլինեին. «Ես ցավում եմ, որ ունեցել ենք 10 զոհ, բայց եթե ավելին լինեին զոհերը, կասեին՝ Քոչարյանը անգործության մատնվեց, տեսեք՝ ինչքան զոհ ունեցանք»,-ընդգծեց Սահակյանը:

Հարցին՝ ինչո՞ւ իրենք չեն կարողանում այս քրեական գործում հաջողության հասնել, պաշտպանը պատասխանեց

«Ե՞րբ է փաստաբաններին այդքան հեշտ եղել հասնել արդարության, երբե՛ք: Ո´չ Լևոն Տեր-Պետրոսյանի, ո´չ Ռոբերտ Քոչարյանի, ո´չ Սերժ Սարգսյանի, ո´չ էլ Նիկոլ Փաշինյանի օրոք: Երբե´ք այդ հաջողությանը չենք հասնելու, երբե´ք: Ես սպասում էի, որ այդ փոփոխությունը կլինի, ասում էի՝ թող մարդուն մեղադրեն այն բանի համար, ինչ արել է, չավելացնեն, չպակասեցնեն: Մի հատ հարց տվեք՝ Հարությունյան Միքայելի գործը կուղարկե՞ն Մոսկվա, թե՞ ոչ: Որովհետև եթե հանձնեն այնտեղ, գործի ջուրը կբացվի, այնտեղի փաստաբանները կճղեն էս գործը»,- ասաց Ռուբեն Սահակյանը և հավելեց, որ ոչ մի ապացույց չկա Ռոբերտ Քոչարյանի մեղադրանքի հիմքում:

Հիշեցնենք, որ հունվարի 18-ին Առաջին ատյանի դատարանի որոշմամբ բավարարվել էր Հատուկ քննչական ծառայության քննիչի միջնորդությունը՝ Ռոբերտ Քոչարյանին կալանքի տակ պահելու ժամկետը երկարացնելու վերաբերյալ: Որոշման դեմ պաշտպանական խումբը վերաքննիչ բողոք էր ներկայացրել, որը սակայն Վերաքննիչ դատարանի փետրվարի 7-ի որոշմամբ մերժվել էր: