Հող հանձնելու ոչ մի տարր ես չեմ տեսնում. Հրաչյա Հակոբյան

«Արցախյան հարցի շուրջ այս տեսակ քննարկումները հնարավոր տարբերակն են՝ այս խնդիրը խաղաղ ճանապարհով լուծելու համար»,-Արցախում տեղի ունեցած Անվտանգության խորհուրդների համատեղ նիստի և տարածված ընդդիմախոսությունների մասին, ԼՈԻՐԵՐ․com–ի հետ զրույցում ասաց Աժ «Իմ քայլը» խմբակցության պատգամավոր Հրաչյա Հակոբյանը։

«Ես չեմ հասկանում, թե մեր ընդդիմախոսները որտեղ են տեսնում հող հանձնելու պրոցես, երբ մենք ասում ենք, որ Արցախի ներկայացուցիչը պետք է լինի բանակցող։ Հող հանձնելու ոչ մի տարր ես չեմ տեսնում։ Նույնիսկ, մի քանի անգամ վարչապետն է նշել, որ ինքը լիազորված չէ, որպեսզի խոսի Արցախի անունից։

Ադրբեջանի պատասխանում ասվում է, որ այդ դեպքում պետք է բանակցություններին մասնակցի նաև Արցախի ադրբեջանական համայնքը։ Բայց այդ համայնքը ապրում է Ադրբեջանում և ընտրել է Իլհամ Ալիևին։ Ոչ մի արցախցի չի ընտրել Նիկոլ Փաշինյանին և չի լիազորել գնալ և բանակցել Արցախի անունից։ Այդ պատճառով Արցախը պետք է գտնվի բանակցային սեղանի շուրջ։ Իհարկե, Հայաստանն էլ պետք է թև ու թիկունք լինի Արցախին։

Իսկ հող հանձնելու մասով՝ կասեմ, որ սոցիալական կայքերում կան մարդիկ, ովքեր և´ հողերն են հանձնում, և´ ասում են, որ պատերազմ է սկսվում։ Ես չեմ հասկանում, թե դա ինչու է արվում, ինչի՞ են ուզում հասնել։ Երբ մենք ընդդիմադիր էինք, մենք նման կեցվածք չէինք ցուցաբերում։ Բոլոր դեպքերում, պետք չէ սահմանն անցնել»,-ասաց Հրաչյա Հակոբյանը։

Աժ պատգամավորը նշեց, որ իր կարծիքով,  ստահոդ լուրերի տարածումը դիվիդենտներ շահելու փորձ է։

Ասպրամ Փարսադանյան