Պատգամավոր Լուսինե Բադալյանը քաղաքացիների հետ շփման շատ կարևոր մտահաղացում ունի

Այսօր` մարտի 20-ին, Առողջապահության և սոցիալական հարցերի մշտական հանձնաժողովը քվեարկության արդյունքում ընդունեց նախագիծ, ըստ որի` Աժ պատգամավորները, փորձագետների հետ միասին, ունենալու են բնակիչների հետ տեսակցության օրեր: Նախագծի նպատակն է` բնակիչների հետ քննարկել իրենց խնդիրները, բարձրաձայնել և լուծման հնարավորություն տալ: Անդրադառնալով նախագծին` «Իմ քայլը» խմբակցության պատգամավոր Լուսինե Բադալյանը ԼՈւՐԵՐ.com-ի հետ զրույցում ընդգծեց, որ կարծում է, թե դա շատ կարևոր մտահաղացում է և այդ պրակտիկան կարելի է ընդլայնել:

«Որքան էլ մենք ասենք, որ հասարակության խնդիրներին տեղյակ ենք և նշենք, որ մեզ այդ հարցում օգնում է օրինակ` սոցիալական մեդիան, բայց հասարակության մեջ մի մեծ զանգված կա, որն իր խնդիրներն այդպիսով բարձրաձայնելու հնարավորություն չունի և մենք, գուցե, տեղյակ չենք: Սա բոլորին տալիս է հնարավորություն` ներկայացնելու իրենց կոնկրետ խնդիրները, որոնք լուծելու ճանապարհին բարդություններ են ունեցել, այդ պատճառով եկել, հասել են Ազգային ժողով: Փորձագետների օգնությամբ` պատգամավորները տեղում կհասկանան, թե կա՞ արդյոք լուծում տվյալ պահին և խնդիրը կլուծվի:

Եթե խնդիրը պահանջելու է պարբերաբար տեսակցություն, ապա, այդ առումով ևս, փորձագետներն ու պատգամավորմերը հետևողական են լինելու»,-ասաց Լուսինե Բադալյանը: Պատգամավորը նշեց, որ իրենց վրա են վերցնում նաև հանրության խնդիրները վեր հանելը, իսկ այդ մեթոդով միայն դրական արդյունք կստացվի:

«Խնդիրների վեր հանման և լուծման տեսանկյունից՝ մեզ մոտ կան տարբեր շերտեր` մեկը պիտի վեր հանի, մյուսը՝ լուծի և այլն: Մենք փորձում ենք, այսպես ասած, հույս չդնել մնացած օղակների վրա և օգտվում ենք այս հնարավորությունից, որովհետև, սա տալիս է հնարավորություն, որպեսզի նաև վերահսկողություն իրականացնենք` այսինքն, եթե անգամ խնդիրը մեր մասով չի, մենք չենք զբաղվում խնդրի լուծմամբ, այդուամենայնիվ, մենք լինելու ենք հետևողական, որպեսզի տվյալ խնդիրը լուծվի»-եզրափակեց Լուսինե Բադալյանը: