Արցախի առաջնագծում զինվորները միշտ զգոն են և պատրաստ կանխելու հակառակորդի ցանկացած գործողություն

ՀՀ Զինված ուժերի գլխավոր շտաբի վարչական ապարատի տեղեկատվական բաժինը զանգվածային լրատվամիջոցների ներկայացուցիչների համար օգոստոսի 8-9-ը կազմակերպել էր այց Արցախի Հանրապետության հյուսիսային և հյուսիս-արևելյան ուղղությամբ տեղակայված զորամասեր և առաջնագիծ:

Լրագրողները երկօրյա այցի ընթացքում հասցրին ծանոթանալ առաջնագծում կատարված ամրաշինական աշխատանքներին ու տեխնիկական հագեցվածությանը:

Լրագրողների հետ զրույցում դիրքերից մեկի ավագ Դավիթ Սարգսյանն, ով արդեն 1 տարի և 6 ամիս է ինչ ծառայում է, նշեց, որ ծառայությունը բավականին հագեցած և հետաքրքիր է անցնում:

«Տեղաշարժեր հակառակորդի կողմից գրեթե ամեն օր լինում է, սակայն շատ հազվադեպ է, որ դրանք վտանգավոր են: Մենք ամեն օր դիտարկումներ ենք իրականացնում և նրանց ամեն շարժ մեր նշանառության տակ է: Վստահ կարող եմ ասել, որ հակառակորդի յուրաքանչյուր քայլ պատրաստ ենք կանխել»,- ասաց դիրքի ավագը և հավելեց, որ վերջին անգամ իրենց ուղղությամբ մարտական գործողություններ իրականացվել են 2-3 ամիս առաջ:

Նա նշեց, որ հանգստի ժամին հասցնում են գիրք կարդալ, զրուցել իրար հետ, նարդի կամ շախմատ խաղալ, սակայն երբեք չեն կորցնում զգոնությունը:

Գումարտակի հրամանատար, փոխգնդապետ Սասուն Ստեփանյանը լրագրողների հետ զրույցում ասաց, որ 2016 թվականից հետո ինժեներական աշխատանքներն ավելի մեծ թափով են իրականացվում:

«Այսօր մեր դիրքերն ապահովված են և գիշերային, և ցերեկային դիտարկման սարքավորումներով, ինչպես նաև ստեղծած են բոլոր պայմանները, որպեսզի մեր զինվորները կարողանան համեմատաբար անվտանգ մարտ վարել»,- նշեց փոխգնդապետը:

Անդրադառնալով սպաների աշխատավարձերի բարձրացմանը՝ Ստեփանյանն ընդգծեց, որ այդ փաստը շատ գովելի է և բոլորը գոհ են: