Երևանով զբոսնելիս ներսս լցվում է աննկարագրելի խաղաղությամբ. Պոլսահայ երգչուհի Մարալ Այվազ

Պոլսահայ երգչուհի Մարալ Այվազը այս օրերին գտնվում է Հայաստանում։ Ermenihaber.am-ի հետ զրույցում նա խոսել է իր ապագա ծրագրերի մասին։

«Այս անգամ այցիս նպատակը նախորդներից շատ տարբեր է։ Քանի որ մեկուկես ամիս առաջ ես թողարկեցի հայերեն երգերի իմ առաջին ալբոմը, ուստի շտապեցի գալ եւ ներկայացնել այն հայաստանցի հանդիսատեսին»,-պատմել է երգչուհին։  

Պոլսահայ երգչուհին շեշտել է նաեւ, որ հայերեն երգերի ալբոմի թողարկման նպատակը Թուրքիայում հայկական երաժշտության տարածումն է. «Ես մեծացել եմ մի ընտանիքում, որտեղ խոսում են հայերեն եւ լսում են հայկական երաժշտություն։ Դեռ մանկուց հայկական երաժշտության հանդեպ ունեցածս սերը տարիների ընթացքում բազմապատկվեց, եւ որպես այդ սիրո արտահայտում որոշեցի հայերեն երգերի ձայնասկավառակ թողարկել։ Ցավոք, ինչպես ցանկացած օտար երկրում, Թուրքիայում նույնպես հայերենը հայերի շրջանում «դժվար է խոսվում», եւ այս ալբոմը թողարկելուս նպատակը այն էր, որ փոքրից մեծ հայերեն երգեր լսեն։ Ուզեցի, որ հայկական երաժշտությունը նրանց տներում հնչի»։ 

Պատասխանելով այն հարցին, թե արդյոք հայկական ինքնության պատճառով իր գործունեության ընթացքում Թուրքիայում որեւէ խոչընդոտի չի հանդիպում՝ երգչուհին պատասխանել է.

«Նախկինում Թուրքիայում հայկական երգերի ալբոմ թողարկելը շատ դժվար էր. ոչ միայն հայերեն, քրդերեն երգերի հանդեպ էլ կարծես արգելանք կար։ Սակայն վերջին 10-20 տարիների ընթացքում իրավիճակը փոխվել է, եւ ազգային փորքամասնության ներկայացուցիչ արվեստագետները ազատորեն կարողանում են գործունեություն ծավալել։ Ես նույնպես որեւէ խոչընդոտի չեմ հանդիպել։ Թուրքիայում հասարակության շրջանում ազգային փոքրամասնությունների լեզուներով երգերի նկատմամբ հետաքրքրություն կա»։

Պատմելով Հայաստանի հանդեպ ունեցած իր սիրո մասին Մարալը նշել է, որ այցերի ընթացքում շրջում է տեսարժան վայրերով, սակայն առավել շատ սիրում է լինել մայրաքաղաքում. «Հայաստանը շատ եմ սիրում, հատկապես Երեւանը։ Երեւանը իմ համար յուրահատուկ վայր է։ Երեւանի փողոցներով քայլելիս կարծես շունչս բացվում է։ Այստեղ զբոսնելիս ներսս լցվում է աննկարագրելի խաղաղությամբ։ Մեր մշակույթը շատ գեղեցիկ ձեւով է ներկայացվում եւ պահպանվում։ Առհասարակ, Հայաստանում մշակույթին, արվեստին մեծ ուշադրություն է ցուցաբերվում»։

Հարցին, թե արդյոք Հայաստանում պատրաստվում է համերգով հանդես գալ, Մարալ Այվազը պատասխանել է.   

«Շատ կցանկանայի այստեղ բեմել ունենալ, ինչպես նաեւ տեսահոլովակ նկարահանել։ Այս ալբոմի շնորհանդեսից հետո հայաստանցի գործընկերներիցս շատ դրական գնահատականներ ստացա, նույնիսկ առաջարկ եղավ զուգերգով հանդես գալու։ Սա ինձ համար պատիվ է»։    

Հայկական ժողովրդական մեներգերով ճանաչված պոլսահայ երգչուհի Մարալ Այվազը մոտ մեկ ամիս առաջ հանրության դատին հանձնեց «Մարալի պես» խորագրով իր առաջին ալբոմը:Ալբոմում տեղ գտած բոլոր 7 երգերը հայերեն են: Ալբոմի երաժշտական պրոդյուսերն է պոլսահայ երաժիշտ, գործիքավորող Արի Հերգելը:Նրա երգերը գործիքավորվել են ժամանակակից եւ հայկական երաժշտական նվագարաններով: Մարալ Այվազը փոքր տարիքում հաճախել էհայկական եկեղեցական երգչախումբ:

Այվազի կատարմամբ հնչել են բազմաթիվ հայերեն երգեր, որոնցից ամենահայտնինեն «Բինգյոլ», «Սարի սիրուն յար» կատարումները: