212 պացիենտի համար մոտ 350 մլն դրամ գումար է ծախսվել. Արսեն Թորոսյան

Հասարակություն 2 Սեպտեմբեր, 2019 17:38

Գլխուղեղի իշեմիկ սուր կաթվածի բուժման պետական ծրագրի շրջանակներում օգոստոսի 27-ի դրությամբ 212 քաղաքացի պետպատվերով ստացել է բուժսպասարկում, նրանցից 182-ը վերադարձել է բնականոն առողջ կյանքին:

Այս մասին ՀՀ վարչապետ Նիկոլ Փաշինյանի հետ քննարկմանն ասաց Առողջապահության նախարար Արսեն Թորոսյանը:

Վարչապետը նկատեց, որ ծրագիրն այս տարի առաջին անգամ է ներդրվել, և հետաքրքրվեց արդյունքներով: Թորոսյանի խոսքով՝ իրականացվում է գլխուղեղի ներանոթային միջամտություն: «Խոսքը միայն 24 ժամվա ընթացքում առաջացած դեպքերի մասին է, երբ կա իրական շանս՝ մարդուն ամբողջությամբ առողջացնելու: Եթե ինսուլտը զարգացել է ինչ-որ մի ժամանակահատվածում, ապա դեռ հույս կա խցանված անոթը բացելու, որ արյան շրջանառությունը գլխուղեղում վերականգնվի: Դրա բուժման երկու ձև կա, առաջինը թրոմբը ցրելու համար դեղ է ներարկվում, եթե դա չի ստացվում, ապա անոթով մտնում են և գլխից թրոմբը քաշում, հանում»,- ասաց Թորոսյանը:

Ներկայում ծառայությունը մատուցվում է երկու բուժհաստատությունում՝ «Էրեբունի» և «Հերացի» հիվանդանոցային համալիրում, աշխատում են 3-րդ կենտրոնում՝«Աստղիկ» ԲԿ-ում ևս այն իրականացնելու ուղղությամբ: Թորոսյանի խոսքով՝ Շտապօգնության բրիգադների լայնածավալ վերապատրաստում են արել, որ ախտանիշները տեսնելու դեպքում միանգամից կապվեն հիվանդանոցների հետ:

Թորոսյանի խոսքով՝ 212 պացիենտի համար մոտ 350 մլն դրամ գումար են ծախսել:

Վարչապետը հետաքրքրվեց, թե քանիսն են լիարժեք նախկին կյանքին վերադարձել: «212-ից 182 հոգի վերադարձել է պրակտիկ առողջ կյանքի, դժբախտաբար 30 մարդու չի հաջողվել փրկել»,- ասաց նախարարը: