Թոշակառու կինը թանկարժեք մատանի է գտել, որը կարող է պատկանել Ուիլյամ Շեքսպիրի ընտանիքին

Թոշակառու բրիտանուհին, որը սիրում է զբաղվել գանձերի որոնմամբ, գտել է հին ոսկյա մատանի, որը կարող է  պատկանել Ուիլյամ Շեքսպիրի ընտանիքին: Այդ մասին գրել է Daily Mail հրատարակությունը:

66-ամյա Սյու Քիլվերթը մետաղափնտրիչ սարքով հետախուզել է Ուորիքշիրի կոմսության Շեքսպիր-հոլլ դաստակերտի ծայրամասերը: Անցյալում այդ հողատարածքը պատկանել է Շեքսպիրի ազգականներին: Եթե հավատանք տեղական լեգենդին, հենց այդտեղ է դրամատուրգը գրել «Ինչպես դա ձեզ դուր կգա» կատակերգությունը: Մետաղափնտրիչն անսպասելիորեն ազդանշան է տվել: Կինն սկսել է փորել և 20 սանտիմետր խորության վրա դեմ է առել ոչ մեծ մատանու: «Ես մտածեցի, որն այն գեղեցիկ է, և վերցրեցի,- պատմում է կինը:- Նա այնքան պստլիկ էր, որ սկզբում ես կարծեցի, որ այն ժամանակակից մանկական մատանի է, բայց հետո ուշադիր նայեցի և հասկացա, որ դա, հնարավոր է, ինչ-որ ավելի կարևոր բան է»:

Գտածոն պատրաստված է ոսկուց, իսկ նրա ներսի կողմում պահպանվել է Truth Betrayes Not («Ճշմարտությունը չի դավաճանում») մակագրությունը: Նման մատանիները 15-17-րդ դարերում շատ տարածված ռոմանտիկ ընծա են եղել Անգլիայում և Ֆրանսիայում: Որպես կանոն, դրանք զարդարում էին սիրային պատմություններից կամ ավանդություններից վերցված համառոտ ցիտատներով:

Քիլվերթը գանձի մասին հայտնել է կորոներին և ծանուցել Բիրմինգհեմի թանգարաններին: Սպասվում է, որ մասնագետներին մի քանի ամիս կպահանջվի այն ուսումնասիրելու և իրենց որոշումը կայացնելու համար: «Ես շատ կցանկանայի մատանին ինձ պահել,- ասում է գանձեր որոնողը:- Նման գտածոներ կյանքում մեկ անգամ են լինում: