Հնարավո՛ր է, որ արտահերթ ընտրություններին առաջադրվեմ որպես պատգամավորի թեկնածու. Գնել Սարգսյան

Այսօր համացանցում տեղեկություն տարածվեց այն մասին, որ դերասան, ՔՊ կուսակցության անդամ Գնել Սարգսյանը առա­ջիկա արտահերթ ընտրություններին կառաջադրվի որպես պատգամավորի թեկ­նածու: Այս թեմայով մեկնաբանություն ստանալու նպատակով ԼՈՒՐԵՐ.com-ը կապ հաստատեց Գնել Սարգսյանի հետ, որն ասաց՝ իրենց կուսակցության ներսում դեռ նման խոսակցություն չկա. «Նման առաջարկություն, անգամ, խոսակցություն չկա մեր կուսակցությունում, մենք նոր-նոր սկսել ենք փոքրիկ հավաքներ անել: Հանդիպումներում քննարկում ենք, թե ինչ կերպով ենք ընտրությունների գնալու, և նմանատիպ այլ հարցեր, բայց դեռ պատկերացում չունենք, թե կոնկրետ մեր համայնքից ովքեր կառաջադրվեն, մեծ մասով՝ ես ոչնչից տեղյակ չեմ»,- ասաց Գնել Սարգսյանը:

Նա, սակայն ո՛չ բացառեց և ո՛չ էլ հերքեց առա­ջիկա արտահերթ ընտրություններին իր՝ պատգամավորի թեկ­նածու առաջադրվելը. «Ես ՔՊ կուսակցության և Մալաթիա-Սեբաստիա հանրային խորհրդի անդամ եմ, այսինքն՝ կուսակցական գործունեություն եմ ծավալում և շատ հնարավոր է, որ առաջիկա արտահերթ խորհրդարանական ընտրություններին առաջադրվեմ պատգամավորի թեկնածու: Չեմ բացառում նաև իմ չառաջադրվելը, քանի որ ընտրությունները դեռ նոր են նշանակված, իսկ թե ովքեր են մասնակցելու ընտրություններին անձամբ մեզ դեռ հայտնի չէ»,- ասաց ՔՊ անդամը՝ հավելելով, որ ՔՊ-ում միանձնյա որոշումներ չեն ընդունվում, որոշում են բոլորը և բոլորն էլ ունեն արտահայտվելու իրավունք. «ՔՊ-ում ոչ մեկը մյուսին ոչինչ չի նվիրում մանդատի տեսքով»,- նշեց մեր զրուցակիցը:

Վերջինս ասաց, որ երբեմն իր մտքով անցնում է դառնալ պատգամավոր՝ տեսնելով շատ-շատ համակարգային անարդարություններ. «Միշտ փորձել եմ պայքարել անարդարությունների դեմ, հիմա էլ գնտվում եմ սոցապ նախարարությունում՝ քաղաքացիների հարցով, և ոչ թե իմ: Փորձում եմ օգտակար լինել մարդկանց: Այո՛, կա մտադրություն ծառայել ժողովրդին»,- ընդգծեց Գնել Սարգսյանը:

Մեր այն հարցին, թե պատգամավոր դառնալու դեպքում, արդյոք կվայելի հասարակության սերն ու վստահությունը, ասաց. «Ես չեմ կարծում, թե իմ ելույթներն ու խոսքերը հանրության կողմից քարկոծվում են և չեմ էլ կարծում, որ առողջ հանրության կողմից ՔՊ-ականներն են քարկոծվում: Մենք շատ լավ գիտենք քարկոծողներին, որոնք իրենց անուն-ազգանունները փոխել են, դարձել՝ հնդիկ, չինացի, աֆրիկացի: Քարկոծողները ոչ թե երկրում տիրող իրավիճակից տանջվողներն են, այլ նրանք, որոնք ունեն իրենց շահադիտական նպատակները»,-նշեց նա:

ՔՊ անդամն ասաց, որ չի կարծում, թե քաղաքականությամբ զբաղվելը կարող է խոչընդոտ հանդիսանալ զբաղվել իր սիրելի աշխատանքով՝ դերասանությամբ. «Սիրում եմ իմ աշխատանքը, իմ ապրելաձևը: Ես սիրում եմ այն, ինչով, որ զբաղվում եմ: Օրինակ պատերազմ էր, գնացի մասնակցելու, պե՞տք էր զինվոր լինել, պե՛տք էր,  այս պահին պե՞տք է զբաղվել հանրային աշխատանքով, պե՛տք է, զբաղվում եմ: Ցավոք սրտի, ինձ ժողովուրդը առավել շատ գիտի սերիալներից, որը որ ես արժևորում եմ, բայց, ցածր եմ գնահատում սերիալ հասկացությունը»,- ասաց Գնել Սարգսյանը՝ հավելելով, որ առաջիկայում ունի մոնո-ներկայացումներով հանդես գալու ծրագրեր. «Չեմ կարծում, թե մեկը մյուսին կխանգարի, եթե անգամ խանգարի էլ կնայեմ, եթե հանրային ծառայությունը նպաստավոր կերպով ստացվում է, ժամանակավոր կտեղափոխվեմ այդ դաշտ: Բայց, իհարկե, իմ սրտում միշտ բեմն է, թատրոնը, ֆիլմն ու արվեստը»,-եզրափակեց Գնել Սարգսյանը:

Զվարթ Պետրոսյան