Գերեվարված զինծառայողների ծնողները Կառավարության մոտից երթով շարժվել են դեպի ՌԴ դեսպանատուն

Երեկ կառավարության մոտ էին հավաքվել եռակողմ հայտարարության ստորագրումից հետո Հին Թաղեր-Խծաբերդ հատվածից գերեվարված՝ շիրակցի 62 զինծառայողների ծնողները: Նրանք հայտարարել էին, որ մտադիր են գիշերել կառավարության շենքի մոտ, քանի որ կառավարության աշխատակազմից իրենց փոխանցել էին, որ՝ Նիկոլ Փաշինյանը մինչեւ ապրիլի 9-ը մեկուսացած է եւ գերեվարվածների ծնողներին ընդունել չի կարող: Ցուցարարների պահանջը մեկն է՝ որոշակի տեղեկություններ ստանալ իրենց հարազատների ճակատագրի մասին:

Այսօր՝ ապրիլի 2-ին, գերեվարված զինծառայողների ծնողներն Կառավարության մոտից երթով շարժվել են դեպի ՌԴ դեսպանատուն:

Ծնողներից մեկը ասաց, որ իրենք նախկինում դիմել էին ՌԴ դեսպանատուն՝ կապված Ադրբեջանի նախագահի եւ ԱԳ նախարարի հայտարարությունների հետ:

«Մենք Ռուսաստանին ներկայացրել ենք պահանջ Ադրբեջանի նախագահի եւ ԱԳ նախարարի հայտարարությունների հետ կապված՝ Լաչին միջանցքով մուտք ու ելքի մասով: Իրենք ուզում էին հող նախապատրաստել, որ մեր երեխաներին թիրախավորեին որպես դիվերսանտներ: Դա մեզ անհանգստացրել է, Ռուսաստանը  որպես եռակողմ համաձայնագրի երաշխավոր կողմ, դիմել ենք ՌԴ դեսպանատուն, խնդրենք, որ սանձեն, զսպեն Ադրբեջանի նախագահին ու ԱԳ նախարարին:

Դա պետք է աներ մեր կառավարությունը, հանդես գար պատասխան հայտարարություններով նույն մակարդակով, որով հանդես էին եկել Ադրբեջանի ղեկավարները: Անտեսել են, քանի որ խոսքը վերաբերել է զինվորներին, իսկ զինվորն իրենց համար որեւէ արժեք չի: Հիմա գնում ենք այդ հարցի պատասխանն ստանալու ՌԴ դեսպանությունից»,-ասաց նա: