Հայաստանը 11 մլն դրամից ավելի կվճարի դատավորի որոշման «շնորհիվ»․ ՄԻԵԴ-ը հրապարակել է վճիռը

Մարդու իրավունքների եվրոպական դատարանն այսօր՝ մայիսի 18-ին, հրապարակել է Դարեսկիզբ ՍՊԸ-ն («Հայկական ժամանակ» օրաթերթ) ընդդեմ Հայաստանի գործով վճիռ՝ ըստ որի՝ հիմնավորել է, որ խախտվել է լրատվամիջոցը ներկայացնող ընկերության արտահայտվելու ազատության իրավունքը: Հայաստանն իր պետական բյուջեից պետք է վճարի մոտ 11 295 000 ՀՀ դրամ որպես ընկերության նյութական ու բարոյական վնասի, ինչպես նաև դատական ծախսերի փոխհատուցում:

 

Նկատենք, որ գործով առաջին ատյանի դատավորը Կարինե Պետրոսյանն է, որը օրեր առաջ նախ տեղեկացրեց դատական համակարգը լքելու, ապա «Պատիվ ունեմ» դաշինքը գլխավորող Արթուր Վանեցյանի քաղաքական թիմին միանալու մասին։ 

 

Բանն այն է, որ Կարինե Պետրոսյանը երեք գործարարների՝ Ռուբեն Հայրապետյանի՝ հանրությանն առավել հայտնի որպես «Նեմեց Ռուբո», Լևոն Սարգսյանի՝ «Ալրաղացի Լյովիկի» և Սամվել Ալեքսանյանի ներկայացրած հայցով լրատվամիջոցին պարտավորեցրել էր վճարել 6 000 000 դրամ բարոյական վնասի փոխհատուցում:

Այսպիսով, Կարինե Պետրոսյանի և հաջորդ ատյաններում գործը քննած դատավորների դատական ակտերի «շնորհիվ» Հայաստանը պարտավորվում է իր պետական բյուջեից վճարել փոխհատուցում մոտ 11 295 000 ՀՀ դրամի չափով:

 

Ինչպես հայտնի է Դարեսկիզբ ՍՊԸ-ն («Հայկական ժամանակ» օրաթերթ) պատկանում է վերջին շրջանում ԶԼՄ-ներին լռեցնելու փորձ իրականացնող իշխանական ուժի ղեկավարի՝ ՀՀ վարչապետ Նիկոլ Փաշինյանի ընտանիքին, որի իրավաբանական թիմի ջանքերով ՀՀ-ում արտահայտվելու ազատության իրավունքի պաշտպանության ուղղությամբ տարված աշխատանքը հաջողությամբ է ավարտվել։