Կարծես հատուկ դիտավորություն է դրսևորվում Սյունիքում՝ իշխանական ուժի համար ինչ-որ թվեր ապահովելու նպատակով. Մելիքյան

Մենք ունենք շատ տիպական խախտումներ, որոնք բազմաթիվ օրինակներով տեսնում ենք։ Մամուլի ասուլիսի ժամանակ ասաց իրավապաշտպան, ընտրությունների վերահսկման կոմիտեի անդամ Ռուբեն Մելիքյանը։

Նրա խոսքով իշխող ուժի ուղղորդմամբ կա՛մ ընդդիմադիր ուժի շտաբի անդամները, կա՛մ ընդդիմադիր հայացքներ ունեցող անձիք, բերման են ենթարկվում, խուզարկություններ են կատարվում, ինչն էական խոչընդոտ է ընդդիմադիր ուժերի ընտրական գործունեության համար։

«Ամենավերջին դեպքն Արմեն Գրիգորյանի դեպքն էր, երբ ինչ-որ պրոիշխանական ուժի ներկայացուցչի ընդամենը հայտարարության հիման վրա այդ մարդուն մեկուսացրել են ընտրական գործընթացից։ Նա հանդես է եկել որպես դիտորդ և նրան հեռացրել են։ Սա անընդունելի է, որովհետև ոստիկանությունը կարող է տեղում բացատրություն վերցնել, ինչից հետո անձը կարող է շարունակել իր գործունեությունը։ Նույն Սիսիանի դեպքերով դատարանը խուզարկության որոշում է տվել՝ հայտնաբերելու համար քվեաթերթիկներ տպող սարք։ Պատկերացրեք քվեաթերթիկներ տպող սարք շտաբներում։ Արդեն որերորդ անգամն է, որ խուզարկություններ են կատարվում ընդդիմադիր տարբեր ուժերի շտաբներում։ Որևէ բան չեն հայտնաբերել։ Այսինքն այդ բոլոր խուզարկությունները եղել են դատարկ»,-ասաց Ռուբեն Մելիքյանը։

Վերջինս նկատեց՝ չի հիշում, որ նախկինում ընտրությունների օրը նման կերպ միջամտեն ընտրական գործընթացին, հատկապես Սյունիքում։ Ռուբեն Մելիքյանի մոտ տպավորություն է ստեղծվել, որ հատուկ դիտավորություն է դրսևորվում Սյունիքում իշխանական ուժի համար ինչ-որ թվեր ապահովելու համար։