Ինձ առաջադրված մեղադրանքը կրում է խիստ քաղաքական բնույթ․ Արմեն Չարչյան

Ինձ առաջադրված մեղադրանքն անհասկանալի է, այն որևէ հանցակազմ չի պարունակում և  կրում է խիստ քաղաքական բնույթ՝ որպես քաղաքական տեռոր։ Այս մասին դատարանից դուրս գալիս լրագրողների հետ զրույցում ասաց «Իզմիրլյան» բժշկական կենտրոնի տնօրեն Արմեն Չարչյանը։

Նա համոզված է, որ դատարանը ճիշտ որոշում կկայացնի․ «Ես հավատում եմ արդարադատությանը և ունեմ այնպիսի դատապաշտպաններ, որոնք լավագույններից են»,- նշեց նա։ 

Ինչ վերաբերում է նրան, որ պարզաբանման մեջ նշվում է՝ հնարավոր է Չարչյանը խուսափի վարույթ իրականացնող մարմնից կամ խոչընդոտի գործի քննությանը, Չարչյանը պատասխանեց․ «Խայտառակութուն է, ես երբեք չեմ խուսափել որևէ բարդությունից»։ 

Անդրադառնալով հարցին, թե ասում են՝ ձայնագրության մեջ հորդորում և պարտադրում է իր աշխատակիցներին մասնակցել ընտրություններին՝ Չարչյանը չհամաձայնեց և պարզաբանեց․ «Որևէ պարտադրանք և հարկադրանք չի եղել, ես կարող եմ խնդրել, դա պարտադրանք չէ, այ եթե ես հորդորելուց հետո որոշակի միջոցներով ստիպեմ որևէ բան անել, այ դա պարտադրանք կլինի»,- ասաց Չարչյանը։ 

Նշենք, որ այս պահին դատարանը քննում է Արմեն Չարչյանին կալանավորելու միջնորդությունը։