Սերգո Կարապետյանի նկատմամբ հնարավոր է՝ հարկադրանք է կիրառվել․ Սերժ Սարգսյանի պաշտպան

ՀՀ 3-րդ նախագահ Սերժ Սարգսյանի և մյուսների գործով դատական նիստի ժամանակ Սերժ Սարգսյանի պաշտպան Ամրամ Մակինյանն ասել է՝ պատրաստվում է ներկայացնել քրեական գործի ապօրինի լինելու վերաբերյալ փաստական հանգամանքներ։

Անդրադառնալով քրեական գործով անցնող նախկին մեղադրյալ Սերգո Կարապետյանի ցուցմունքներին, Մակյանը նշել է, որ վերջինս 2 անգամ հարցաքննվելուց ամիսներ անց դիմում է ուղարկել ՀՔԾ՝ իր ցուցմունքը լրացնելու նպատակով, հոկտեմբերի 4-ին ևս հարցաքննվել է, բայց այդ հարցաքննության արձանագրությունը քրգործում չկա։ Մակյանը նշել է՝ կասկածներ կան, որ հնարավոր է Սերգո Կարապետյանի նկատմամբ հարկադրանք է կիրառվել․ «Սերգո Կարապետյանը 2019թ․-ի հարցաքննության ժամանակ տվել է քրեական գործը հերքող ցուցմունք։ Սակայն խնդիրն այն է, որ Սերգո Կարապետյանի հոկտեմբերի 4-ի հարցաքննության արձանագրությունը մեր գործում չկա, ինչից կարելի է ենթադրել, որ այդ օրը տեղի է ունեցել քննչական գործողություն, որի արձանագրությունը քրեական գործում չկա։ 2019թ․-ի հոկտեմբերի 7-ին Սերգո Կարապետյանի անունից ձեռագիր դիմում են ուղարկում ՀՔԾ, որտեղ նշվում է, որ ինքը նախկինում ցուցմունք է տվել և հիմա ուզում է լրացնել։ Հունիսից մինչև հոկտեմբեր Սերգո Կարապետյանը, եթե հայտնելու բան ուներ, թող հայտներ»,- նշեց փաստաբանը։

Գործով մեղադրող դատախազ Արսեն Մարտիրոսյանը նշեց, որ Մակինյանն իր խոսքը, թե հարկադրանք է կիրառվել Սերգո Կարապետյանի նկատմամբ, ենթադրյալ հանցագործության մասին տեղեկություններ է պարունակում․ «Եթե նման բան կա, թող կոնկրետ տեղեկություններ հայտնի կամ պարզաբանի՝ սա ինչ է նշանակում»,- ասաց դատախազը։