Արմեն Չարչյանին կալանավորելու որոշման դեմ բողոքի քննությունը հետաձգվեց

Պրոֆեսոր Արմեն Չարչյանի կալանքի հարցով պաշտպանների վերաքննիչ բողոքի քննությունը հետաձգվեց աշխատանքային ժամն ավարտվելու պատճառով։ Լրագրողների հետ զրույցում այս մասին հայտնեց Արմեն Չարչյանի պաշտպան Էրիկ Ալեքսանյանը։

«Մեր բողոքի քննության ժամանակ պայմանավորվածություն ձեռք բերեցինք, որ աշխատանքային օրվա ավարտից հետո, այսինքն` ժամը 18-ից հետո էլ շարունակենք աշխատանքը և բողոքի քննությունն ավարտենք այսօր։ Սրան գործով դատախազը չառարկեց, սակայն հետո մի պահ կարծես նեղացավ ու հայտարարեց, որ չի ցանկանում այլևս, որ բողոքի քննությունն աշխատանքային օրվա ավարտից հետո շարունակվի»,–ասաց Ալեքսանյանը` հավելելով, որ դատախազի վարքագիծն անհասկանալի էր իրենց համար։

Փաստաբանի խոսքով` այն փաստական տվյալները, որոնք տրամադրված էին, առաջին ատյանի դատարանը պետք է գնահատեր ամբողջ ծավալով, պետք է գնահատեր նաև տեսաձայնագրությունը, որը ներկայացրել էր պաշտպանական կողմը։ Պաշտպանական կողմը Վերաքննիչ դատարանում բարձրացրել են այն հարցը, որ հիմնավոր կասկածն այնքանով պատշաճ չէ, որ գնահատման չի արժանացել իրենց տրամադրած տեսաձայնագրությունը, որը փաստաբանի խոսքով հերքում է հիմնավոր կասկածը։

«Դատախազը ներկայացրեց իր փաստարկները մեր բողոքի վերաբերյալ։ Շատ անհիմն փաստարկներ ներկայացրեց։ Այնպիսի տպավորություն է, որ դատախազությունը ցայտնոտի մեջ է գտնվում, որովհետև լարված էր խոսում և անհասկանալի էր դատախազի՝ ամենավերջում դրսևորած վարքագիծը։ Կողմերը և դատարանը պայմանավորվածություն ձեռք բերեցին, որ ժամը 18։00-ից հետո կարող ենք շարունակել մեր աշխատանքը, դատախազը չառարկեց, սակայն մի պահ դատախազն ինչ-որ հոգեվարքի մեջ հայտնվեց ու հայտարարեց, որ չի ցանկանում այլևս բողոքի քննությանը մասնակցել»,- ասաց փաստաբանը։