Բացակայում է թե՛ ձերբակալման հիմքը, թե՛ նպատակը․ փաստաբանը՝ Քարահունջ բնակավայրի վարչական ղեկավարի ձերբակալման մասին

Լուսինե Ավետյանի ձերբակալումն ակնհայտ անհիմն և ապօրինի է։ Այս մասին ԼՈՒՐԵՐ․com-ի հետ զրույցում ասաց Գորիս համայնքի Քարահունջ բնակավայրի վարչական ղեկավար Լուսինե Ավետյանի փաստաբան Րաֆֆի Ասլանյանը՝ նշելով, որ իր պաշտպանյալը չի ընդունում առաջադրված մեղադրանքը։ 

Նա նշեց, որ Լուսինե Ավետյանը շարունակում է մնալ ձերբակալված և գտնվում է ձերբակալվածներին պահելու վայրում․ «Ձերբակալման արձանագրությունը բողոքարկվել է դատարան՝ հաշվի առնելով, որ այն անհիմն է, բացակայում են ինչպես ձերբակալման հիմքը, այնպես էլ նպատակը։ Բացի այդ` կասկածանքի էությունը պարզ չէ և հիմնավորված չէ»,- ասաց նա։ 

Փաստաբանն ասաց, որ Լուսինե Ավետյանը ցուցմունք տվել է, սակայն բովանդակությունը չի կարող հրապարակել․ «Որպեսզի պարզ համեմատություններ անցկացվեն իրավապահ մարմինների կողմից հրապարակված տեքստերի հետ, որոնք իմ կարծիքով ավելի շատ հասարակության մտավոր սահմանափակ կարողություններ ունեցող մարդկանց համար են և այդպիսի մարդկանց ականջը շոյելու համար, ընդամենը կարող եմ ասել, որ Լուսինե Ավետյանը որևէ մեկին օգնություն տալու, տրամադրելու լիազորություն, հնարավորություն չունի, ինքն ինքնուրույն համայնքի ղեկավար չի հանդիսանում և այդ մարդկանցից որևէ մեկին օգնություն տրամադրելու և այլ գործընթացներում գրավոր և բանավոր միջամտություն չունի»,- նշեց Ասլանյանը։

Նշենք, որ ըստ ՀՔԾ-ի՝ Գորիս համայնքի Քարահունջ բնակավայրի վարչական ղեկավար Լուսինե Ավետյանը մեղադրվում է ընտրակաշառք տալու մեջ։ Քրեական գործով փաստական տվյալներ են ձեռք բերվել, որ Լ.Ա.-ն, օգտագործելով Քարահունջ բնակավայրի չորս բնակիչներին 2021 թվականի մայիս ամսվա ընթացքում բանկային փոխանցման միջոցով «Դրամական աջակցություն» անվան տակ 100.000-220.000 ՀՀ դրամ տրամադրելու հանգամանքը, նրանց հարկադրել է մասնակցել  ՀՀ ԱԺ արտահերթ ընտրությունների կապակցությամբ 2021 թվականի հունիսի 8-ին Գորիս քաղաքում «Հայաստան» դաշինքի կողմից կազմակերպվելիք քարոզարշավին, ինչպես նաև խոչընդոտել է վերջիններիս ընտրական իրավունքի ազատ իրականացմանը` հարկադրելով մասնակցել ընտրություններին և կողմ քվեարկել հիշյալ դաշինքի օգտին:

Սոնա Հարությունյան