Այժմ ոչ թե քարերը նետելու, այլ հավաքելու ժամանակն է․ Ավինյանը՝ նոր ընտրություններ անցկացնելու կոչերի մասին

«Քաղաքացիական պայմանագիր» խմբակցությունը երբեք չի խուսափել արտահերթ ընտրություններից, և ընդունել է այն արդյունքները, որոնք ձևավորվել են քաղաքացիների ազատ կամարտահայտման արդյունքում:

Երևանի նորընտիր ավագանու առաջին նիստում այս մասին հայտարարեց «Քաղաքացիական պայմանագիր» խմբակցության անդամ, Երևանի քաղաքապետի թեկնածու Տիգրան Ավինյանը։

«Երկրում ստեղծված իրավիճակը, հազարավոր մեր հայրենակիցների՝ Լեռնային Ղարաբաղից բռնի տեղահանումը, բոլորիս պետք է համախմբի ամեն կերպ նրանց աջակցելու, նրանց կարիքները հոգալու և սատարելու գործում: Իսկ նոր ընտրությունները, այս փուլում համենայն դեպս, ոչնչով չէին նպաստելու դրան։ Ավելին՝ շիկացնելու էին առանց այն էլ առկա լարված մթնոլորտը: Այժմ, կարծում եմ, ոչ թե քարերը նետելու, այլ հավաքելու ժամանակն է»,- ասաց Ավինյանը։

Երևանի ավագանու նոր ընտրություններ անցկացնելու առաջարկով հանդես էին եկել «Ազգային առաջընթաց» կուսակցությունը և «Մայր Հայաստան» դաշինքը։ Նրանք ընդդիմադիր մյուս ուժերին կոչ էին անում չմասնակցել Երևանի ավագանու առաջին նիստին, քվորում չապահովել, որպեսզի նոր ընտրություններ նշանակվեն։ Սակայն «Հանրային ձայն» կուսակցությունը մասնակցեց նիստին և ապահովեց քվորում։ Երևանի քաղաքապետի միակ թեկնածուն «Քաղաքացիական պայմանագիր» կուսակցության ներկայացուցիչ Տիգրան Ավինյանն է։