«Հրապարակ». Լևոն Տեր–Պետրոսյանի խոսքը, որոշումը` դրական և բացասական, այսօր պահանջված է

Ինչո՞ւ է լռում Լևոն Տեր-Պետրոսյանը` հարցնում են շարքային և ոչ այնքան շարքային քաղաքացիները: Ինչո՞ւ չի հայտարարում` պատրաստվո՞ւմ է արդյոք առաջադրվել նախագահական ընտրություններում, թե՞ ոչ: Այս լռությունը, ըստ իս, այնքան էլ անմեղ չէ: Այն դեստրուկտիվ դեր է խաղում` համենայնդեպս ընդդիմադիր դաշտում: Բացատրեմ միտքս: Տեր-Պետրոսյանը միշտ և բոլոր ժամանակներում համարվել է և համարվելու է ՀՀ նախագահի ամենաանցողիկ թեկնածուներից մեկը: Նրա առաջադրվելու և չառաջադրվելու պարագայում միանգամայն այլ իրավիճակ կարող է ստեղծվել երկրում: Երբ ՀՀ առաջին նախագահը լռում է, այսինքն` չի հստակեցնում իր մտադրությունները, մյուսները, և հատկապես իր թիմակիցները, նույնպես չեն կարողանում հստակեցնել իրենց անելիքները: Եթե Լևոն Տեր-Պետրոսյանն առաջադրվի, բնական է, որ նրա թիմից ոչ մեկը չի առաջադրվի, իսկ ընդդիմությունից քչերը կառաջադրվեն: Երբ նա լռում է և չի ասում, թե ինչ կա մտքին, բնականաբար, խանգարում է բոլոր պոտենցիալ թեկնածուներին, որոնք պետք է հսկայածավալ աշխատանք տանեն` առաջադրվելու պարագայում, թիմ ձևավորեն, շտաբներ ստեղծեն, մարտավարություն մշակեն և այլն:

Անշուշտ, հակված չեմ կարծելու, թե նրա լռությունը ընդդիմության թեկնածուներին հատուկ վնասելու նպատակ է հետապնդում: Բայց անգամ եթե այն միտումնավոր չէ, միևնույն է` վնասակար է ու վտանգներով հղի: Սա հենց գործող իշխանության շահերից է բխում, երբ ընդդիմադիր դաշտում շփոթ է ու չկողմնորոշված վիճակ, երբ ոչ մի թեկնածու` իշխանականից բացի, չգիտի իր անելիքը: Այնպես որ, Տեր-Պետրոսյանի խոսքը, որոշումը` դրական և բացասական, այսօր պահանջված է: Դրանից հետո իրենց անելիքը կպատկերացնեն ոչ միայն ՀԱԿ-ի ժողովուրդը, այլև նույն ԲՀԿ-ն և մյուսները»: